Италиядаги Этна яна фаоллашди

Италия жанубидаги энг фаол вулқонлардан бири - Этна тоғи жума куни кечқурундан шанба куни эрталабгача қалин кул булути ва лава оқимини сочди.

Сицилия оролида жойлашган Этна вулқони ҳаракати апрель ойи бошидан давом этяпти. “Анадолу” агентлиги маҳаллий манбаларга таяниб хабар беришича, 2900 метр баландликдаги чўққида жойлашган жануби-шарқий кратер жума куни маҳаллий вақт билан соат 19:00 атрофида уйғониб, шанба тонгига қадар тинмаган. Магма отилиши натижасида вулқон ён бағирлаб пастга ҳаракатланган ва уч изда лава оқимини ҳосил қилган. Яқин орадаги бир неча қишлоқда гумбурлаган портлаш аниқ эшитилган.

Миллий Геофизика ва вулқоншунослик институти Катания филиали мазкур ҳодисани тасдиқлади. Оммавий ахборот воситалари Этна фаоллиги сабаб, бир кечада авиация тизими учун “тўқ сариқ” огоҳлантириш эълон қилинганини ёзди.

Тоғ ёнида жойлашган Катания-Фонтанаросса аэропортидан амалга оширилган парвозларга кул ёки лава чиқиндиси таъсири сазилмаган, ҳаво қатнови ўзгаришсиз давом этган.

Европадаги энг баланд (тахминан 3300 метр) ва фаол Этна вулқони апрель ойи бошидан буён тўртинчи марта фаоллашди.