Флоренция шаҳридаги "Мирзо Улуғбек" миллий-маданий марказда Ўзбекистоннинг туристик салоҳиятига бағишланган "Ўзбекистон – Ипак йўли дурдонаси" номли тақдимот бўлиб ўтди, деб хабар бермоқда «Дунё».
Тақдимот Ўзбекистоннинг Италиядаги элчихонаси томонидан мамлакатимизнинг Тоскана ва Умбрия вилоятларидаги Фахрий консуллиги ҳамда Италиянинг «Adventus Tour» компанияси ҳамкорлигида ўтказилди.
Тадбирда 60 тага яқин маҳаллий туристик агентлик вакиллари, Флоренция шаҳри ва Флоренция кенгаши расмийлари ҳамда Италиядаги ватандошлар иштирок этдилар.
Тақдимотда Ўзбекистон элчиси Абат Файзуллаев, фахрий консул Леонардо Комуччи, миллий-маданий марказ раҳбари Комила Киргизова ва «Adventus Tour» компанияси директори Наталья Вердиц сўзга чиқишди.
Элчи ўзининг кириш нутқида тингловчиларнинг эътиборини Ўзбекистоннинг маданий ва илмий алмашинувларни ривожлантиришга қаратилган халқаро жараёнлар ва ташаббусларнинг тарғиботчиси сифатидаги тобора ошиб бораётган ролига қаратди. Ушбу саъй-ҳаракатлар октябрь ойида Ўзбекистонда Бутунжаҳон туризм ташкилоти Бош ассамблеясининг 25-сессияси ўтказилиши, шунингдек, ЮНЕСКО Бош конференциясининг 43-сессиясини 2025 йилда Самарқанд шаҳрида ўтказиш қарорида ўз тасдиғини топди.
Ўзбекистон Президенти туризм соҳасини "миллий иқтисодиётнинг стратегик тармоқларидан бири" деб белгилагани, туризмни ривожлантиришга давлат томонидан катта эътибор қаратилаётгани, солиқ имтиёзлари, субсидиялар ва меҳмонхона қувватларини кенгайтириш учун кредитлар кўринишида мисли бўлмаган молиявий кўмак ажратилаётгани таъкидланди. Шунингдек, 2023 йилда Италиядан Ўзбекистонга сайёҳлар сони уч баравар кўпайиб, 23 минг кишидан ошгани ҳам қайд этилди.
Фахрий консул Леонардо Комуччи Ўзбекистонда самарали туризм инфратузилмаси, юқори даражадаги хавфсизлик, шунингдек, хорижий инвесторларга туризм бизнесини ривожлантириш учун ҳам, мамлакат иқтисодиётининг бошқа барча соҳаларида ҳам тақдим этилаётган кенг имкониятлар ҳақида маълумот берди.
"Мирзо Улуғбек" миллий-маданий марказининг директори Комила Киргизова италиялик меҳмонларни Ўзбекистоннинг бой маданий-тарихий мероси, дунёнинг турли бурчакларидан келадиган сайёҳларнинг қизиқишини уйғотадиган ва эътиборини тортадиган кўҳна марказлар – Самарқанд, Бухоро ва Хива билан таништирди.
Италиянинг «Adventus Tour» компанияси раҳбари компания ҳар йили Ўзбекистоннинг сайёҳлик йўналишлари бўйлаб мингга яқин Италия фуқароларини юборишини маълум қилиб, сайёҳлар орасида ушбу йўналиш юқори талабга эгалиги ва шу сабабли "Uzbekistan Airways"нинг тўғридан-тўғри рейсларига авиачипталар бир неча ой олдин бронь қилинишини алоҳида таъкидлади.
Тадбирда Ўзбекистонга ташриф буюрган Италия фуқаролари ҳам сўзга чиқдилар. Италиялик меҳмонлар мамлакатимизнинг маданий-меъморий жозибадорлиги, маҳаллий аҳолининг меҳмондўстлиги, Ўзбекистондаги яшаш ва ҳаракатланиш учун қулай шароитларни юқори баҳолаб, бир овоздан фикр билдиришди.
Тадбирда иштирок этган Италия компаниялари тақдимот давомида Ўзбекистон имкониятлари ҳақида батафсил маълумотга эга бўлганлари, мамлакатимиз йўналишида сайёҳлар гуруҳларининг мунтазам сафарларини йўлга қўйишга қизиқишларини билдирдилар.