Венгрия қўшинлари кириши учун тайёргарлик? Украинада айғоқчилик тармоғи фош қилинди

Венгрия разведкаси Закарпатеда аҳолининг, агар Венгрия Қуролли Кучлари минтақага кириб келса, қандай муносабатда бўлиши ҳақида маълумот тўплаган.

Украина Хавфсизлик Хизмати мамлакат тарихида биринчи марта Киевга қарши айғоқчилик қилган Венгрия ҳарбий разведкасининг агентлик тармоғи фош этилганини маълум қилди.

Ушбу гуруҳнинг вазифаси Закарпат вилоятининг ҳарбий мудофаа имкониятлари ҳақида маълумот тўплаш, минтақанинг қуруқлик ва ҳаво мудофаасидаги заиф жойларини аниқлаш, шунингдек, маҳаллий аҳолининг ижтимоий-сиёсий қарашларини ўрганиш эди. Хусусан, Венгрия қўшинлари минтақага кириб келган тақдирда, аҳолининг хатти-ҳаракатлари сценарийлари ўрганилган.

Айтилишича, УХХ Венгрия махсус хизмати тармоғига мансуб икки агентни қўлга олган, иккала шахснинг назоратчиси эса Венгрия ҳарбий разведкасининг кадрли ходими бўлган.

Тергов маълумотларига кўра, унинг агентларидан бири Берегов туманидан бўлган 40 ёшли собиқ ҳарбий бўлиб, у 2021 йилда хорижликлар томонидан ёлланган ва "кутиш режими"га ўтказилган ҳамда 2024 йил сентябрида "фаоллаштирилган". Иштирокчининг вазифаларига қуйидагилар кирган:

▪️Агар вилоятга тинчликпарвар кучлар, хусусан, Венгрия ҳарбийлари кирса, Закарпатя ҳарбийлари ва тинч аҳолисининг муносабати қандай бўлиши;
▪️Закарпатя қора бозоридан қандай ҳарбий анжомлар ва қурол-яроғларни сотиб олиш мумкинлиги;
▪️Минтақада венгер аҳолисининг кўчиб кетиши билан боғлиқ вазият қандай эканлиги;
▪️Закарпатеда қандай ҳарбий кучлар жойлашганлиги, транспорт ва жанговар машиналар сони қанчалиги;
▪️Ҳуқуқни муҳофаза қилувчи органларнинг тўлдирилганлик даражаси ва уларнинг сони қанчалиги каби маълумотлар.