Ўзбекистон Республикаси Президентининг 2024 йил 1 февраль куни «Рақамли технологиялар халқаро марказини ташкил этиш бўйича биринчи навбатдаги чора-тадбирлар тўғрисида»ги ПФ-25-сон Фармони қабул қилинди.
Мамлакатимизда рақамли технологиялар бозорининг инвестиция жозибадорлигини ошириш учун янада қулай шарт-шароитлар яратиш, рақамли иқтисодиётни ривожлантиришга хорижий инвестицияларни фаол жалб этиш, рақамли технологиялар соҳасидаги корхоналарнинг экспорт фаолиятини жадаллаштириш ва уларнинг халқаро бозорлар билан интеграциялашувини кенгайтириш мақсадида:
Ўзбекистон Республикаси Президентининг 2023 йил 11 сентябрдаги «Ўзбекистон – 2030» стратегиясини 2023 йилда сифатли ва ўз вақтида амалга ошириш чора-тадбирлари тўғрисида”ги ПҚ–300-сон қарори билан IT соҳада хизматлар экспорти ҳажмини 5 миллиард долларга, яратилган иш ўринлари сонини 100 мингтага етказиш, IT-Паркда хорижий компаниялар учун янада қулай шароитлар яратиш ва уларнинг ваколатхоналари сонини 1 000 тага етказиш вазифаси белгиланган.
Фармонга мувофиқ, IT-Парк ҳудудида рақамли технологиялар соҳасида маҳсулотлар ишлаб чиқариш ва хизматлар кўрсатиш учун қулай шароитларга эга бўлган махсус ҳудуд сифатида Рақамли технологиялар халқаро маркази (International Digital Technology Center – “ENTERPRISE UZBEKISTAN”) ташкил этилади.
Шунингдек, 2024 йил 1 июндан бошлаб 5 йилгача бўлган муддатга Марказда хорижий компаниялар учун қўлланиладиган махсус ҳуқуқий режим эксперимент тариқасида жорий қилинади.
Марказ ҳудудида эксперимент тариқасида қуйидаги соҳаларда махсус ҳуқуқий режим жорий этилади:
рақамли технологиялар соҳасида инновациялар, хизматлар ва бизнес маҳсулотларини ишлаб чиқиш ва синовдан ўтказиш бўйича «тартибга солиш қумдони»ни жорий этиш;
божхона ва солиққа тортиш;
меҳнат муносабатлари;
молия ва банк фаолияти;
шахсга доир маълумотларга ишлов бериш ва уларни ҳимоя қилиш;
давлат хизматларини кўрсатиш;
интеллектуал мулкни ҳимоя қилиш;
тижорат ва фуқаролик низоларини кўриб чиқиш белгиланди.
Бунда, Рақамли технологиялар вазирлиги махсус ҳуқуқий режимни жорий этиш бўйича ваколатли орган ҳисобланади.
