Исроил президентининг орзуси нима?

Исроил президенти Ицхак Герцог Саудия Арабистони билан тинчликни нишонлашни орзу қилади.

Бу ҳақда у Американинг Newsweek журналига берган интервьюсида айтиб ўтди.

"Менинг орзум, масалан, Саудия Арабистони валиаҳд шаҳзодаси Муҳаммад бин Салмон Ол Сауд билан тинчликни нишонлаш", деди яҳудий давлати президенти.

У “Ислом ва тавҳид бешиги ва яҳудийликнинг бешиги биргаликда дунёни ўзгартириши мумкин”, деб баҳолади. Исроил президенти Ар-Риёд билан тинчлик ўрнатиш шахсан ўзи учун ҳам, бутун минтақа учун ҳам “муҳим воқеа” бўлишини қўшимча қилди. Раҳбар, шунингдек, “Яқин Шарқнинг келажаги яҳудийлар ва мусулмонлар ўртасидаги мулоқотда” эканини таъкидлади.

Валиаҳд шаҳзода 18 ноябрь куни Оқ уйда АҚШ президенти Дональд Трамп билан учрашуви чоғида Исроил билан муносабатларни нормаллаштиришни бошлаш учун Ар-Риёдга Фаластин давлатини яратиш бўйича “қайтиб бўлмайдиган, ишончли ва вақт чегараланган йўл” зарурлигини таъкидлади.

2020 йил сентябрида Исроил АҚШ воситачилигида БАА ва Баҳрайн билан нормаллаштириш келишувига қўшилди. Уч томонлама битим "Иброҳим келишуви" номи билан машҳур эди. Кейинроқ Марокаш ва Судан яҳудий давлати билан муносабатлар нормаллашганини эълон қилди. Бу келишувларга қадар Исроил араб давлатлари орасида фақат Миср ва Иордания билан дипломатик алоқалар ўрнатган эди.