Исроил миллий терма жамоаси бош мураббийига ҳужум уюштирилди

Афинада Исроил миллий жамоаси бош мураббийига ҳужум уюштирилди. Бу ҳақда derby.it нашри хабар бермоқда.

Манбага кўра, мураббий Бен Шимон Конференциялар лигаси саралашидан ўрин олган Грециянинг «AEK» ва Исроилнинг «Hapoel Be'er Sheva» клублари ўртасидаги учрашувни томоша қилиш учун Афинага учиб келган.

Аммо ўйин олдидан у ёқимсиз вазиятга тушиб қолган, яъни бир мухлис яҳудийларни ҳақорат қилиб, Фаластинга эркинлик бериш ҳақидаги шиорлар билан мураббийга хитоб қилган.

«Биз қийин вазиятга тушиб қолдик. Безори ўзи эмас эди, у вазият кескинлашиши учун провокация қилаётган эди. Биз биринчи учраган таксига ўтириб, стадионни тарк этдик», - деди Шимон.