Испанияда ҳам ўрмон ёнғинлари бошланди

Испаниянинг Кадис провинциясидаги Тарифа шаҳрида ўрмон ёнғинлари сабабли 1500дан ортиқ одам эвакуация қилинди.

Бу ҳақда Mundo нашри хабар бермоқда.

"Атрофдаги меҳмонхоналар, кемпинглар ва турар-жой биноларидан 1550 киши эвакуация қилинди. Энг бошиданоқ август ойида меҳмонхоналарни тўлдирадиган дам олувчиларни эвакуация қилиш зарур эди", деб ёзади нашр.

Унга кўра, Torre La Peña лагерида бошлангани тахмин қилинаётган ёнғин сайёҳлик ҳудудига ўтган. Чоршанбага ўтар кечаси Андалусия ўрмон ёнғинларини ўчириш хизматининг 100 дан ортиқ мутахассислари ёнғин N-340 автомагистрали ва меҳмонхона мажмуаларига етиб боришининг олдини олиш учун ишлади. Эрталаб ёнғинни ўчиришга олтита самолёт жалб қилинган.

Расмийлар одамларни ушбу ҳудудлардаги пляжларга бормасликка чақирди ва хавфли зонадаги меҳмонхоналар, лагерлар ва муассасаларга киришни тақиқлади. Қисқа вақт ичида 5 мингдан ортиқ автомобиль ҳудуддан олиб чиқилди, эвакуация қилинган одамларнинг бир қисми эса иккита вақтинчалик жойлаштириш пунктига юборилди.

Тарифа мери Хосе Антонио Сантоснинг сўзларига кўра, ёнғин сўнгги йиллардаги энг жиддий ёнғин бўлиб, курашга провинсия бўйлаб ўт ўчирувчилар жалб этилган.