Инфантино: «Ким президент бўлишини миллий ассоциациялар ҳал қилади»

ФИФА президенти Жанни Инфантино халқаро футбол ташкилоти раҳбарлигидан кетиш ҳақидаги талабларга жавоб қайтарди. У ўз ваколатларининг қонунийлигини таъкидлаб, келажаги миллий футбол федерациялари қарорига боғлиқ эканини билдирди.

FIFA Forward Enterprise лойиҳаси атрофидаги можародан кейин УЕФА раҳбари Александер Чеферин ва КОНКАКАФ президенти Виктор Монталяни Инфантинонинг истеъфосини талаб қилган эди.

«Мени дунёнинг 211 та миллий ассоциацияси сайлаган. Футбол барчага тегишли бўлса, ҳар бир федерациянинг овози тенг аҳамиятга эга бўлиши керак. Шунинг учун кўпчиликнинг қарорини ҳурмат қилишимиз шарт», — деди Инфантино.

ФИФА раҳбари ўз позициясини ҳимоя қилар экан, Осиё ва Африка футбол ташкилотлари томонидан қўллаб-қувватланаётганини алоҳида таъкидлади.

Эътиборлиси, ОФК президенти Шайх Салмон бин Иброҳим ал-Халифа август ойида Инфантинони танқид қилган раҳбарлар қаторида бўлган. Бироқ октябрь ойида Осиё конфедерацияси унинг қайта сайланишини қўллаб-қувватлади.

Келишмовчиликка ФИФА мусобақаларининг тижорий ҳуқуқлари билан боғлиқ FIFA Forward Enterprise ташаббуси сабаб бўлган. Лойиҳа доирасида жаҳон чемпионати ва бошқа турнирлар билан боғлиқ тижорий улушларни хусусий инвесторларга сотиш кўзда тутилган, аммо кескин эътирозлардан сўнг режа бекор қилинган.

Инфантино футбол тақвими, турнирлар формати, иштирокчилар сони ва тижорий масалалар бўйича турли қарашлар бўлишини табиий ҳолат деб баҳолади. Унинг фикрича, бундай келишмовчиликлар якуний қарорни қабул қиладиган миллий федерацияларнинг ҳуқуқини ўзгартирмайди.

ФИФА президентлиги учун навбатдаги сайлов 2027 йил март ойида ўтказилади. Инфантино яна бир муддатга ўз номзодини илгари сурмоқда.