Ҳусийлардан кучли армия ва ҳарбий қуролларга эга Саудия ҳусийларни тўхтата оладими?

Асосий сабаб Ҳусийларга қарши тўлиқ уруш бошлашнинг нархи ва оқибати жуда катта эканлигида. Саудия бу урушни аввал бошидан кечирган. 2015–2022 йилларда Саудия бошчилигидаги коалиция Ҳусийларга қарши деярли 7 йил ҳарбий операция олиб борди. Катта ҳаво кучига қарамай, Ҳусийлар йўқ қилинмади. Аксинча, улар ракета ва дронлар билан Саудиянинг нефть объектларига зарба бериш имкониятини сақлаб қолди.

Энг катта қўрқув — Ҳусийларнинг армияси эмас, аксинча энди гуллаб келаётган Саудия иқтисодиётида. Ҳусийлар арзон дронлар билан уларни яна 10-20 йилга орқага қайтариши мумкин. Саудия Ҳусийларга қарши катта операция бошласа, Ҳусийлар Саудиянинг Янбу, Жидда шаҳарларига нефть объектларига, портларга ва танкерларга янада кўпроқ зарба беришлари мумкин. Ҳозирнинг ўзида Саудиянинг East–West нефт қувури зарба туфайли тўхтаган. Бу қувур нефтьни Форс кўрфазидан Қизил денгизга олиб ўтарди.

Ҳусийлар ҳам оддий армия эмас. Саудия ҳаво кучлари кучли. Лекин Ҳусийларни бир неча кунлик бомбардировка билан йўқ қилиб бўлмайди. Улар:
тоғли ҳудудларда яширинган;
дронлардан фойдаланади;
баллистик ракеталари бор;
ерости инфратузилмасига эга;
катта жанговор тажриба орттирган;

Эрондан қурол, технология ва тайёргарлик олган деб баҳоланади. Шунинг учун Саудия Ҳусийларни ҳаводан қаттиқ урса ҳам, уларни ерда тўлиқ йўқ қилиш учун Яман ичига яна катта қўшин киритишига тўғри келади. Бу эса яна узоқ йиллик урушга айланиши мумкин.

Айни пайтда вазият жиддийлашган: Ҳусийлар Баб-эль-Мандеб атрофидаги позицияларини кучайтирган ва Қизил денгиздаги стратегик ҳудудларни эгаллаган. Шу сабабли Саудия учун бу масала энди оддий Яман муаммосидан кўра миллий хавфсизлик ва нефть экспорти масаласига айланиб бормоқда.