Ҳусанов АПЛда қайси жамоага қарши ўйинда дебютини ўтказиши мумкинлиги маълум

Тез орада расман «Манчестер Сити» футболчисига айланадиган Абдуқодир Ҳусановнинг дебюти қайси жамоаларга қарши ўйинда амалга ошиши маълум.

Ўзбекистонлик футболчи дам олиш кунларида «шаҳарликлар» сафида тиббий кўрикдан ўтиши кутилаётгани ҳақида инглиз ОАВлари хабар берди. Инсайдер Фабрицио Романо эса, манчестерликлар бош мураббийи Пеп Гвардиола Ҳусановнинг тезроқ жамоа машғулотларига қўшилишини истаётганини маълум қилди. Англия чемпионининг ҳимоядаги муаммоларидан келиб чиқилса, Абдуқодир Ҳусановнинг «Ман Сити» сафида Премьер-лигада дебют қилишини узоқ кутмаймиз.

«Манчестер Сити» бугун, 11 январ куни Англия кубоги доирасида «Солфорд Сити»га қарши майдонга тушади ва бу баҳсда Ҳусановнинг ўйнамаслиги аниқ. Манчестер клуби трансфер ҳақида душанба кунигача расман эълон қилган тақдирда, Ҳусанов «Сити»нинг АПЛ доирасидаги 14 январ, сешанба оқшомида «Брентфорд»га қарши сафардаги ўйинида ёки 19 январ куни «Ипсвич Таун»га қарши сафардаги баҳсда дебютини ўтказиши мумкин бўлади.

Чемпионлар лигасида эса «шаҳарликлар» либосида дебютини 22 январ куни Парижда «ПСЖ»га қарши ўтказиши мумкин. 25 январда эса «Сити»ни АПЛ доирасида «Челси»га қарши ўйин кутиб турибди.

«Ман Сити»нинг навбатдаги ўйинлари тақвими:

14 январ. АПЛ. Брентфорд – Ман Сити

19 январ. АПЛ. Ипсвич – Ман Сити

22 январ. ЕЧЛ. ПСЖ – Ман Сити

25 январ. АПЛ. Ман Сити – Челси

29 январ. ЕЧЛ. Ман Сити – Брюгге

2 феврал. АПЛ. Арсенал – Ман Сити