ҲАМАС Ғазо секторидаги қочқинлар учун ажратилган чодирларни мусодара қилишда айбланди

ҲАМАСнинг қуролланган вакиллари гуманитар ташкилотлар томонидан Ғазо сектори аҳолисига тақдим этилган чодирларни мусодара қилишда айбланмоқда. The Telegraph нашри хабар беришича, гуруҳ гуманитар ёрдамнинг бир қисмини тақсимлашни ўз назоратига олиб, бу орқали даромад олишга уринган. Мазкур айбловлар Фаластинлик кўчирилган аҳоли лагерларини кучли ёмғир ва сув тошқинлари қамраб олган бир пайтда янгради.

The Telegraph маълумотларига кўра, ҲАМАС хавфсизлик хизмати ходимлари БМТ Тараққиёт дастури билан ҳамкорликда қочқинлар лагерларидаги шароитни яхшилаш устида ишлаган маҳаллий мансабдор шахсларни ушбу ҳудудларга бошқа бормаслик тўғрисидаги мажбуриятни имзолашга мажбур қилган.

Лойиҳа доирасида ажратилган чодирларнинг бир қисми ҳам мусодара қилинган бўлиши мумкин.

Кучли ёмғирлар оқибатида Ғазо секторидаги қарийб 70 мингта чодир сув остида қолган. Дайр ал-Балаҳ шаҳрида қум тўсиғининг ўпирилиши бир неча кишининг ҳаётига зомин бўлган.

Айниқса, чодир лагерларида яшашга мажбур бўлган 1,4 миллионга яқин кўчирилган аҳоли оғир аҳволда қолмоқда.

Халқаро ташкилотлар Исроилни ҳам вақтинчалик бошпаналар қуриш учун зарур материаллар етказиб берилишини чеклашда айбламоқда.

БМТ маълумотларига кўра, Ғазо секторига олиб кириш учун рухсат кутаётган чодирлар сони қарийб 150 мингтани ташкил этмоқда.