Гвардиола фаластинликлар ҳақида: «Ҳеч ким авлодлар давомида азоб-уқубатларни енгиб яшамаслиги керак»

«Манчестер Сити»нинг собиқ бош мураббийи Пеп Гвардиола яна бир бор Фаластин халқини қўллаб-қувватлашга чақирди.

Испаниялик мутахассис видео мурожаат йўллади. Ушбу видео БМТнинг Фаластин қочқинларига ёрдам кўрсатиш ва ишларни ташкил этиш бўйича Яқин Шарқ агентлиги (UNRWA) ижтимоий тармоқлардаги саҳифаларида эълон қилинди.

«Булар шунчаки вафот этган одамлар эмас. Булар ўлдирилган инсонлар. Булар рақамлар эмас, балки ўз исмлари, юзлари, оилалари, орзулари ва хотираларига эга бўлган инсонлар ҳаётидир.

Булар урушнинг тасодифий қурбонлари эмас, балки ўғил-қиз болалардир. Биз нарсаларни ўз номи билан аташдан тўхтасак, азоб-уқубатларни яширадиган сўзлардан фойдалансак, инсонийлигимизни йўқотамиз.

Биз тарихимизнинг жуда қоронғи даврида яшаяпмиз. Ғазода вайроналар орасидан ота-онасини излаётган болаларни кўряпмиз. Улар ёрдам сўрашмоқда, очликдан азият чекишмоқда, ёлғиз қолишмоқда.

Биз уларнинг улғайишга улгурмасиданоқ ҳамма нарсасини йўқотганига гувоҳ бўляпмиз.

Дўзах давом этмоқда. У билан бирга фаластинликларни инсон сифатида қадрсизлантириш ҳам давом этяпти. Уларнинг ҳаёти ҳам бизнинг ҳаётимиз каби муҳим.

Уларнинг азоб-уқубатлари бугун бошлангани йўқ. Келинг, буни унутмайлик. Фаластин билан бирдамликда ҳам, бизнинг масъулиятимизда ҳам танаффус бўлиши мумкин эмас.

Бугунги кунга келиб, Исроил ҳукумати Ғазода 74 мингдан ортиқ инсонни ўлдирди ва гуманитар ёрдам етказилишига тўсқинлик қилишда давом этмоқда.

Ғазо вайрон бўлган бир пайтда, Ғарбий соҳилда фаластинликларнинг уйларини бузиш ва одамларни мажбуран кўчириш ҳам давом этмоқда.

Шуни эсда тутиш керакки, миллионлаб фаластинлик қочқинлар учун азоб-уқубатлар ҳозир бошлангани йўқ.

Улар ўнлаб йиллар давомида мажбурий кўчишлар, зўравонлик, йўқотишлар, қайғу, оғриқ, руҳий жароҳатлар, ноаниқлик ва адолатсизлик шароитида яшаб келмоқда. Аммо шунга қарамай, улар олдинга интилишда давом этишмоқда.

Биз фаластинликларнинг матонатига қойил қоламиз. Лекин улар бундай матонат кўрсатишга мажбур бўлмаслиги керак.

Ҳеч ким авлодлар давомида азоб-уқубатларни енгиб ўта олишини исботлашга мажбур бўлмаслиги лозим.

Ҳеч бир бола яшашни ўрганишдан олдин омон қолишни ўрганмаслиги керак.

Ана шундай даҳшатли шароитда уларни бирор кун ҳам ёрдамсиз қолдирмаган ташкилот бор. Унинг номи — UNRWA.

75 йилдан ортиқ вақт давомида UNRWA фаластинлик қочқинларга тиббий хизмат, ҳимоя ва гуманитар ёрдам кўрсатиб келмоқда.

Аммо UNRWA шунчаки ёрдам ташкилоти эмас. У хотира ҳамдир. Бу ташкилот фаластинлик қочқинларнинг бир неча авлоди тарихи, ўзлиги ва ҳуқуқларини сақлаб келмоқда.

Бу эса бир халқнинг мавжудлигини ўчириб ташлаб бўлмаслигини исботлайди.

Бугун UNRWAни қўллаб-қувватлаш ҳар қачонгидан ҳам муҳимроқ.

UNRWAни қўллаб-қувватлаш — очлик, зўравонлик ва қўрқувга қарши курашаётган инсонларни қўллаб-қувватлаш демакдир.

Чунки вайронкорликни давом эттириш учун одамларнинг жим туриши керак. Аммо биз жим турмаймиз.

Бугун сукут сақлаш ҳам томонлардан бирини танлашнинг бир кўринишидир.

Фаластин муҳим. Фаластинга адолат ва тинчлик керак.

Илтимос, Фаластин ҳақида гапиришда давом этинг. Бефарқликка қарши курашда инсонийликни ҳимоя қилишдан тўхтаманг.

Агар имкониятингиз бўлса, илтимос, UNRWAни қўллаб-қувватланг. Шунда биз ёрдамга энг муҳтож инсонларга кўмак кўрсатишда давом эта оламиз.

Катта раҳмат», — деди Гвардиола.