Гонконг Россиядан олтин импорт қилишни рекорд даражага оширди

Гонконг 2026 йилнинг дастлабки етти ойида Россиядан 112,7 тонна олтин импорт қилди. Бу мамлакат тарихидаги энг юқори кўрсаткич бўлди, деб хабар берди CNBC BullionVault компанияси таҳлилига таяниб.

Россиядан етказиб берилган олтин ҳажми 2025 йил давомидаги кўрсаткичдан ҳам ошиб кетган. Ўтган йил Гонконг Россиядан 92,1 тонна олтин импорт қилган.

Таққослаш учун, 2021 йилда, Ғарб санкциялари жорий этилгунига қадар, Россиядан Гонконгга атиги 3,3 тонна олтин етказиб берилган.

Таҳлилчилар Россия олтини экспортининг Осиё бозорларига қайта йўналтирилганини импорт ҳажмининг кескин ошишига асосий сабаблардан бири сифатида кўрсатмоқда.

Gatehouse Advisory Partners катта маслаҳатчиси Вита Спивакнинг таъкидлашича, Гонконгга келаётган Россия олтининг муҳим қисми кейинчалик материк Хитойига йўналтирилмоқда.

2022 йилдан кейин АҚШ, Европа Иттифоқи ва Буюк Британия Россия олтини импортига нисбатан чекловлар жорий қилган. Хитой эса ушбу санкцияларга қўшилмаган.