Германиядаги илмий марказ Европа Иттифоқи санкциялари остидаги Россия олигархидан пул олган

Германиядаги илмий марказ Европа Иттифоқи санкциялари остидаги Россия олигархидан пул олган — Süddeutsche Zeitung.

Шимолий Рейн-Вестфалия федерал штатидаги Юлих тадқиқот маркази (FZJ) физика, кимё, биология ва тиббиёт соҳаларига ихтисослашган бўлиб, Германия давлатидан молиявий маблағ олади. Унинг йиллик бюджети тахминан 500 миллион еврони ташкил этади.

Немис нашрининг ёзишича, 2022–2025 йилларда FZJ "Euro-Chem Agro GmbH" компанияси билан тузилган шартномалар асосида бешта лойиҳа ўтказган ва улар учун 221 457 евро олган. Бу компания Германиянинг Мангейм шаҳрида жойлашган, бироқ у бош қароргоҳи Швейцарияда бўлган "Euro-Chem Group AG" компаниясининг шўъба корхонаси ҳисобланади. Ушбу компания эса ўз навбатида россиялик миллиардер Андрей Мелниченко билан иқтисодий жиҳатдан боғлиқ, деб ёзмоқда Süddeutsche Zeitung.

Россиялик тадбиркор ва йирик инвестор Мелниченко — Сибир кўмир энергетика компанияси (СУЭК) ва "Еврохим" компанияси асосчисидир. Россиянинг Украинага босқини бошланганидан кўп ўтмай, 2022 йил 9 мартда ЕИ Мелниченкога қарши санкциялар жорий қилган, бироқ бундан бир кун олдин олигарх ўзига тегишли компанияларни рафиқаси Александранинг номига қайта расмийлаштирган. Бу Швейцарияга унинг компанияларидан санкцияларни олиб ташлаш имконини берган.

FZJ журналистлар сўровига жавобан билдиришича, илмий марказ санкциялар рўйхатини текширишни фақат тўғридан-тўғри шартномавий ҳамкори бўлган "Euro-Chem Agro GmbH" билан чеклаган ва компаниянинг мулкчилик тузилмасига аниқлик киритмаган.