"Германия учун муқобил" (АfD) партияси депутатлари Санкт-Петербург халқаро иқтисодий форумида иштирок этиш учун таклифни қабул қилди

Бундестагдаги ўта ўнгчи Afd фракциясининг иқтисодий сиёсат бўйича вакили Штеффен Котре ва Afd'нинг Саксония федерал еридаги бўлими раҳбари Йорг Урбан 3-6 июн кунлари бўлиб ўтадиган Санкт-Петербург халқаро иқтисодий форумида (ПМЭФ) иштирок этишларини t-online порталига тасдиқладилар.

Нашрнинг аниқлик киритишича, АfD'нинг бундестагдаги фракцияси раиси ўринбосари Маркус Фронмайер ҳам Санкт-Петербургга боради. Халқаро иқтисодий форумда АfD'дан Европа парламенти депутати Петр Бистрон ҳам иштирок этади.

Бистрон Bild нашри билан суҳбатда сафар сабабларини шундай изоҳлади: "Урсула фон дер Ляйен номидан Путинга урушни тўхтатиши кераклигини шахсан етказмоқчиман. Мен урушнинг тезроқ тугаши ва иқтисодий муносабатларнинг нормаллашуви тарафдориман. Мюнхендан келган европарламент депутати сифатида ҳам Siemens, ҳам BMW Россияда яна тўлиқ ҳажмда фаолият юритишини истайман", — деди у.

Штеффен Котре t-online нашрига сафарининг мақсадларидан бири "биз ҳарбий риторикани эмас, балки тинч дипломатияни исташимизни кўрсатиш" эканлигини, Германия федерал ҳукумати эса, афсуски, бу риторикадан асоссиз фойдаланаётганини айтди. Бундан ташқари, унинг сўзларига кўра, мамлакатга яна "Россиядан келадиган арзон ва хавфсиз энергия" керак.

"Саксонияга Европа тинчлиги ва фаровонлигининг кафили сифатида Россия керак", — дея таъкидлади Урбан.

Bild маълумотларига кўра, Москва томонидан АfD сиёсатчиларига юборилган таклифномада Санкт-Петербург халқаро иқтисодий форуми "адолатли тинчлик ва хавфсиз келажак йўлида ишбилармонлик, сиёсий ва маданий алоқаларни мустаҳкамлашга" ҳисса қўшиши кераклиги таъкидланган.

Ҳужжат Путиннинг яқин маслаҳатчиси Антон Кобяков томонидан имзоланган. Мактубда Россия президенти тадбирда иштирок этиши кўрсатилган, дейилади хабарда.