Германия разведкасининг собиқ раҳбари жосусликда гумон қилиниб ҳибсга олинди

Германия разведкасининг собиқ раҳбари жосусликда гумон қилиниб ҳибсга олинди. У лавозимидан кетганидан сўнг ҳар йили бир марта Россияга борган.

Германия Федерал прокуратураси Германия Федерал разведка хизматининг (BND) собиқ раҳбари Август Ҳаннингни жосуслик ва давлатга хиёнатда гумон қилиб ҳибсга олгани маълум қилди. Ҳаннинг билан биргаликда унинг аппарати собиқ раҳбари Манфред Д. ҳам қўлга олинган.

Ҳаннинг 1998–2005 йилларда BND раҳбари лавозимида ишлаган. Прокуратура тахминига кўра, у лавозимини тарк этгач, 2010 йилда Манфред Д. билан пул мукофоти эвазига BND'дан маълумотларни унга узатиб туриши ҳақида келишиб олган.

Олинган ҳужжатлардан Ҳаннинг ўша вақтда шуғулланган хусусий консалтинг фаолиятида фойдаланмоқчи бўлган. Ўша пайтдан то 2022 йилгача у шу йўл орқали икки мингга яқин ҳужжатни олган, уларнинг кўпчилиги махфий бўлган.

Тhe Insider нашрининг аниқлашича, Ҳаннинг BND'дан кетганидан сўнг Россияга камида етти марта борган. Уларнинг барчаси 2015 йилдан 2019 йилгача бўлган даврга тўғри келади. У Москвага ўртача бир йилда бир марта сафар қилган.

"Бу сафарларнинг баъзилари бир суткадан ҳам камроқ давом этган. Ҳаннинг Москвага кечқурун учиб келиб, эртаси куни қайтиб кетган. Масалан, 2016 йилнинг ёзида у 6 июл куни кечқурун Мюнхендан Москвага учиб келган, 7 июл кундузи эса Берлинга қайтиб кетган. Яна бир шундай сафар (бу сафар Германия пойтахтидан ва орқага) 2019 йилнинг май ойида амалга оширилган", дейилади суриштирув материалида.