Германия разведкаси собиқ раҳбари маълумотларни Озарбайжонга узатган бўлиши мумкин

Германия Федерал разведка хизмати (BND) собиқ раҳбари Аугуст Ханнинг хизматдан кетганидан сўнг Озарбайжон разведкасига маълумот узатган бўлиши мумкин. Бу ҳақда Der Spiegel хабар берди.

Нашр маълумотларига кўра, терговчилар Ханнинг BND раҳбарлигидан кетганидан кейин хорижий разведка хизмати хавфсизлик тузилмаси ходими учун таҳлилий ҳисоботлар тайёрлаган бўлиши мумкин, деб ҳисобламоқда. Ушбу шахс Озарбайжон разведкаси офицери бўлган бўлиши эҳтимоли ҳам кўриб чиқилмоқда.

Ханнинг 1998–2005 йилларда Германия ташқи разведка хизматига раҳбарлик қилган. Давлат хизматидан кетгач, у хусусий секторда маслаҳатчи ва лоббист сифатида ишлаган. Шунингдек, Германия–Озарбайжон форуми бошқаруви аъзоси бўлган.

Аввалроқ Германия Федерал прокуратураси Ханнинг жосусликда гумонланаётганини маълум қилган. У давлатга хиёнат қилишга уриниш ҳамда бошқа давлат манфаатлари йўлида махфий разведка фаолияти олиб боришда гумон қилинмоқда.

Агар айбловлар судда тасдиқланса, Ханнинг олти ойдан 10 йилгача озодликдан маҳрум қилиниши мумкин.