Германия нега Patriot тизимини Киевга топшира олмайди?

Германияда атиги олти дона Patriot тизими қолган ва уларни Киевга топшира олмаймиз, бироқ АҚШдан яна иккита комплекс сотиб олишга тайёрмиз — Германия мудофаа вазири

Борис Писториуснинг Financial Times'га берган интервюсида айтишича, Берлин ўзидан мавжуд бўлган 12 та Patriot тизимларидан учтасини аллақачон Украинага берган ва ҳозирда Германияда атиги 6 та комплекс қолган. Унинг сўзларига кўра, яна икки комплекс Полша томонидан ижарага олинган, камида биттаси эса техник хизмат кўрсатиш ёки тайёргарлик сабаблари билан доимий фойдаланишга яроқсиз ҳолатда.

"Бу жуда ҳам кам. Айниқса, NATO олдидаги мажбуриятларимизни инобатга олсак. Шунуси аниқки, буз бундан кўпроқ комплексни бера олмаймиз", — дея таъкидлади Писториус.

Шунга қарамай, у июн ойида АҚШлик ҳамкасби Пит Ҳегсет томонидан таклиф этилган режани муҳокама қилишни режалаштирмоқда, бу режа Украина учун иккита Patriot тизимини сотиб олишни назарда тутади.

Писториус, шунингдек, Россиянинг яқинда амалга оширган авиазарбалари ва Киевнинг такрорий сўровларига қарамай, Германия Украинага ўзининг узоқ масофали Taurus ракеталарини етказиб бермаслигини билдирди.