Германия элчихонаси маслаҳатчиси Исломободда ўлик ҳолда топилди

Германиянинг Покистондаги элчихонаси маслаҳатчиси икки кундан бери алоқага чиқмаганидан сўнг Исломободдаги квартирасида ўлик ҳолда топилди.

Бу ҳақда Bild нашри ёзмоқда.

Қайд этилишича, Томас Б аслида Германия Федерал разведка хизматида (BND) ишлаган бўлса-да, дипломат ҳисобланган.

У икки кун давомида элчихонага келмагани ва қўнғироқларга жавоб бермаганидан сўнг, икки миссия ходими эркакнинг қароргоҳига юборилган. Улар квартирада ҳамкасбининг жасадини топишди.

Bild таъкидлаганидек, Томас Б юрак билан боғлиқ муаммоларга дуч келган, бу эса ўлимга олиб келиши мумкин. У 3,5 йил давомида Исломободда миссия маслаҳатчиси бўлиб ишлаган.

"Афсуски, биз ҳамкасбимизнинг ўлимини тасдиқлашга мажбурмиз", — деди Германия ТИВ нашрига. BND, қоида тариқасида, агентликнинг алоҳида ходимларига тегишли вазиятларга изоҳ бермаслигини таъкидлади. Bild нашрининг ёзишича, Томас Б. узоқ вақт Германия разведкасида ишлаган ва жуда тажрибали ходим ҳисобланган.