Германия 13 ёшгача бўлган болаларга ижтимоий тармоқлардан фойдаланишни тақиқламоқчи

Германия ҳукумати болаларнинг интернетдаги хавфсизлигини кучайтиришни режалаштирмоқда. Таклифлар орасида 13 ёшга тўлмаган болалар учун ижтимоий тармоқлардан фойдаланишни тақиқлаш, ўсмирларга нисбатан чекловлар жорий этиш ва бошланғич синф ўқувчилари учун сунъий интеллект бўйича махсус таълим дастурини ишлаб чиқиш бор.

Ҳукумат ислоҳотнинг асосий йўналишларини маъқуллаган, бироқ тегишли қонунлар ҳали қабул қилинмаган.

Европа Иттифоқи даражасида ягона қоидалар жорий этилгунига қадар Германия ўз чекловларини белгилашни режалаштирмоқда. Болалар учун махсус ишлаб чиқилган платформалар бундан мустасно бўлиши мумкин. 13 ёшдан 18 ёшгача бўлган ўсмирлар учун эса бир неча босқичли чекловлар назарда тутилган. Бироқ уларнинг аниқ шартлари ҳозирча белгиланмаган.

Ҳукумат ижтимоий тармоқлар платформаларини болалар хавфсизлигини дастлабки босқичдан ҳисобга олишга мажбурлашни ҳам таклиф қилмоқда. Жумладан, алгоритмик тавсияларни дастлабки ҳолатда ўчириб қўйиш, шунингдек, фойдаланувчиларни узоқ вақт интернетда ушлаб туришга қаратилган функцияларга қарши чоралар кўриш режалаштирилган. Бундай функцияларга лентани чексиз айлантириш ва видеоларни автоматик намойиш этиш киради.

Яна бир ташаббус — «ИИ-Seepferdchen» деб номланган дастур. Унинг номи Германияда болаларга сузишни ўргангани учун бериладиган махсус нишондан олинган.

Дастур бошланғич синф ўқувчиларига сунъий интеллект иловаларини таниш, уларнинг имкониятлари ва хавфларини тушуниш ҳамда технологиялардан онгли фойдаланишни ўргатишга қаратилган.

Ҳозирча гап келгуси сиёсатнинг асосий йўналишлари ҳақида бормоқда. Чекловлар қачон кучга кириши ҳозирча маълум эмас.

Bitkom сўрови натижаларига кўра, Германия аҳолисининг 79 фоизи болалар учун «ИИ-Seepferdchen» дастурини фойдали деб ҳисоблайди.