Ғазо шимолига уюштирилган ҳаво ҳужуми оқибатида 30 га яқин фаластинлик ҳалок бўлди

Исроилнинг Ғазо сектори шимолидаги Жабалия шаҳрига берган зарбаси оқибатида камида 29 фаластинлик ҳалок бўлди.

Бу ҳақда Фаластиннинг ХАМАС ҳаракати билан алоқадор "Quds" портали хабар берди.

Портлаш кўчирилганлар яшайдиган лагерни нишонга олган. Порталнинг таъкидлашича, кун бошидан бери анклавда жами 59 киши ҳалок бўлган.

Эслатиб ўтамиз, 18 март куни Исроил армияси секторда ҳарбий амалиётларни қайтадан бошлаб, унга қарши оммавий зарбалар берди ва шу тариқа жорий йилнинг январь ойида ўрнатилган сулҳни тўхтатди. Исроил Бош вазири Беньямин Нетаньяхунинг идораси буни ХАМАСнинг воситачилар ва АҚШ президентининг махсус элчиси Стивен Виткоффнинг музокаралар чоғида илгари сурилган таклифларни рад этиши билан изоҳлаб, Ғазодаги операциядан мақсад барча гаровга олинганларни озод қилиш эканини айтди. Радикаллар жанговар ҳаракатлар қайта бошланганида Исроил ва АҚШни айблади.