G20 саммитига Жанубий Африка Республикаси таклиф этилмайдими?

Трамп 2026 йил Маямида бўладиган G20 саммитига Жанубий Африка Республикаси таклиф этилмаслигини эълон қилди — The Insider.

Бундан аввал АҚШ амалда Йоханнесбургдаги (ЖАР) G20 саммитини бойкот қилиб, ҳукумат даражасида расмий делегация юборишдан бош тортган эди. Вашингтон раисликни топшириш маросими учун ЖАРдаги АҚШ элчихонаси ходимини тайинлади. Претория буни "ҳақорат" деб атади ва бу ҳаракат дипломатик протоколга зид эканини билдирди. Натижада маросим саммит тугаганидан сўнг, ЖАР Ташқи ишлар вазирлиги биносида ўтказилди, чунки АҚШ саммитда иштирок этмаган эди.

Трамп айнан шу вазиятдан ЖАРни келгуси саммитда иштирокдан чиқариш учун расмий асос сифатида фойдаланмоқда. АҚШ президенти, шунингдек, ЖАРга тўланадиган тўлов ва субсидияларни тўхтатишини ва мамлакат "ҳеч қайси ташкилотда аъзоликка лойиқ эмас"лигини айтди.

Шу билан бирга, Трамп яна бир бор ЖАРдаги африканерлар (оқ танлилар) геноциди ва уларга нисбатан тазйиқ ҳақидаги фикрларни такрорлади. Бу иддаолар ҳуқуқ ҳимоячилари, тадқиқотчилар ва ҳатто айрим африканерларнинг ўзи томонидан ҳам асоссиз деб тан олинган.

"Бу 1999 йилда G20 ташкил қилинганидан бери илк марта аъзолардан бири расман иқтисодий форумдан чиқарилиши ҳисобланади. Манбаларга кўра, АҚШ маъмурияти 2026 йилги саммитга ЖАРни ўрнига Полшага иштирок этиш учун таклиф юборишни режалаштирмоқда", дея ёзади The Insider.