Франциянинг давлат қарзи ҳар сонияда 5000 еврога ошиб бормоқда

Франция оғир иқтисодий аҳволда, мамлакатнинг давлат қарзи ҳар сонияда 5000 еврога ошиб бормоқда.

Бу ҳақда республика бош вазири Франсуа Байру фуқароларга йўллаган видеомурожаатида маълум қилган.

"Франциянинг қарзи ҳар сонияда кечаю кундуз 5 минг еврога ошиб бормоқда", — деди ҳукумат раҳбари.

Унга кўра, мамлакатнинг давлат қарзи аллақачон 3,4 триллион еврога етган. "Бу ҳатто тасаввур қилиш қийин бўлган миқдор", деди Байру.

Бош вазир ортиқча қарзни Франция иқтисодиёти учун асосий таҳдид деб атади ва харажатларни камайтиришга қаратилган шошилинч чоралар кўриш зарурлигини маълум қилди. У, шунингдек, Франция давлат қарзига хизмат кўрсатиш нархининг тез ошиб бораётганига ишора қилди. "2026 йилда қарз бўйича фоиз харажатлари 8 млрд еврога ошади. 2027 йилда эса ҳеч нарса қилинмаса, 10 млрд еврога кўп бўлади. Ва агар биз ҳеч нарса қилмасликда давом эцак, 2029 йилга келиб бу харажатлар миқдори йилига 100 млрд еврога этади", - дея таъкидлади вазирлар маҳкамаси раҳбари. 2024 йилда қарзга хизмат кўрсатиш қиймати 59 миллиард еврони ташкил этди. Байру, шунингдек, Францияда бюджет номутаносиблиги 50 йилдан ортиқ давом этаётганини, бу қабул қилиб бўлмас эканлигини қўшимча қилди. "Франциянинг сўнгги мувозанатли бюджети 1974 йилда тақдим этилган эди, бу ҳақда ўйлаш ҳам қийин", деди бош вазир.