Францияда ўқувчилар намойишлари бошланганидан буён 5 мингдан ортиқ киши ушланган

Ички ишлар вазирлигига кўра, уларнинг қарийб 85 фоизи вояга етмаганлар, аксарияти эса мактаб ўқувчиларидир.

Таълим вазирлиги эса мамлакатдаги 3 700 та ўрта мактабдан 564 тасида иш ташлашлар ва тўсиб қўйиш ҳолатлари қайд этилганини билдирган.

Таълим вазири Эдуар Жеффренинг BFMTV эфирида айтишича, тартибсизликлар оқибатида 65 нафар мактаб ходими, жумладан, 40 нафар директор жароҳатланган. Юздан ортиқ мактаб биносига зарар етказилган.

Ички ишлар вазири Лоран Нунес норозилик ҳаракатларининг кўламини катта ва кутилмаган деб баҳолаган. У намойишларнинг тез ёйилишини, жумладан, ижтимоий тармоқлар ҳамда ўқувчилар чиқишларини қўллаб-қувватлаётган сўл популистик “Бўйсунмас Франция” партияси таъсири билан боғлаган. Вазирнинг таъкидлашича, зўравонлик билан боғлиқ вазият ташкилотчилар назоратидан бутунлай чиқиб кетган.

Дастлабки норозилик акциялари 21 сентябр куни Париж яқинидаги Кретей шаҳрининг Сент-Экзюпери лицейида бошланган. Кейин улар мамлакат бўйлаб тарқалган. Юқори синф ўқувчилари синфларда ўқувчилар ҳаддан ташқари кўплиги, ўқитувчилар етишмаслиги ва таълим муассасаларининг ёмон ҳолатидан норози. Шунингдек, улар дарс жадвали ҳаддан ташқари тиғиз эканини айтмоқда.

Айрим йирик шаҳарларда норозилик акциялари полиция билан тўқнашувларга айланган. Баъзи ҳолатларда намойишчилар тошлар ва ёнувчи аралашма солинган шишалардан фойдаланган. Полиция эса жавобан кўздан ёш оқизувчи газ қўллаган.