«Фенербаҳче» спорт директори Элдор Шомуродовнинг агенти билан учрашди

Ўзбекистон миллий терма жамоаси ҳамда Туркиянинг “Башакшеҳир” клуби ҳужумчиси Элдор Шомуродов фаолиятини Истанбулнинг бошқа жамоасида давом эттириши мумкин.

Маълумотларга қараганда, Туркия Суперлигасида чемпионлик учун кураш олиб бораётган “Фенербаҳче” клуби спорт директори Девин Ўзек бугун ўзбекистонлик футболчининг агенти билан учрашув ўтказган. Ҳозирча ушбу музокаралар натижаси ҳақида маълумот берилмади.

Аввалроқ Шомуродовни трансфер қилиш масаласида “Фенербаҳче” клуби “Башакшеҳир” билан музокара ўтказгани ҳамда Истанбул клуби Элдорнинг трансфери учун 20 миллион евро талаб қилгани ҳақида хабарлар тарқалганди.

Маълумот учун, Элдор Шомуродов 2025 йил ёзидан буён “Башакшеҳир” сафида тўп суриб келмоқда. Ҳужумчи шу вақтга қадар клуб таркибида 29 та учрашувда майдонга тушиб, 15 та гол ва 5 та ассист қайд этган. Айни пайтда у Туркия Суперлигасининг энг яхши тўпурари бўлиб, чемпионат доирасида 14 та гол ва 4 та ассист муаллифига айланган.