Европа Исроилга қарши бош кўтармоқда

Швеция Исроил элчисини Ташқи ишлар вазирлигига чақирди. Аввалроқ Европа давлатлари Ғазодаги гуманитар ёрдам блокадаси туфайли Исроилни санкциялар билан таҳдид қилганди.

Швеция Ғазо секторидаги гуманитар ёрдам билан боғлиқ вазиятни тушунтириш учун Исроилнинг Стокголмдаги элчисини чақиради, деди душанба куни Бош вазир Улф Кристерссон. Бу ҳаракат Исроилга нисбатан кучаяётган халқаро босимнинг бир қисми сифатида амалга оширилмоқда.

Аввалроқ Буюк Британия, Канада ва Франсия қаттиқ огоҳлантириш бериб, агар секторда ҳарбий ҳаракатлар давом этса ва гуманитар ёрдам блокадаси сақланиб қолса, санкциялар қўлланилиши билан таҳдид қилган эди. Бунга исроиллик ҳарбийлар томонидан операциянинг янги босқичи эълон қилиниши ва Исроил бош вазири Бинямин Нетаняхунинг Ғазонинг бутун ҳудудини тўлиқ назоратга олиш нияти ҳақидаги баёнотлари сабаб бўлди.

“Исроил расмийларининг тинч аҳолига ҳаётий инсонпарварлик ёрдамини кўрсатишдан бош тортиши қабул қилиб бўлмайди ва халқаро гуманитар ҳуқуқнинг бузилиши сифатида баҳоланиши мумкин”, — дейилади уч давлатнинг қўшма баёнотида.

Исроил армияси Хон Юнус марказини уруш ҳудуди деб эълон қилди ва ҳаво ҳужумларида 60 дан ортиқ одам ҳалок бўлди. Исроил молия вазири Безалел Смотричнинг айтишича, армия "Фаластин Ғазосидан қолган ҳамма нарсани йўқ қилади".

Британия аллақачон Исроил билан кенгайтирилган савдо келишуви бўйича музокараларни тўхтатган. Ташқи ишлар вазири Девид Ламми исроиллик вазирларнинг Ғазони “тозалаш” ва фаластинликларни мажбуран кўчириш ҳақидаги риторикасини қоралади.

Европа Иттифоқи Исроил билан савдо шартномасини расмий қайта кўриб чиқишни бошлади. “Биз бу жараённи бошлаяпмиз, аммо ҳозирча қарор Исроилга боғлиқ – у инсонпарварлик ёрдамини блокдан чиқариши керак”, деди Европа Иттифоқининг ташқи сиёсат бўйича раҳбари Кажа Каллас.

Франсия ташқи ишлар вазири Жан-Ноел Баррот Исроилни Ғазони “ўлим тузоғига” айлантирганликда айблади. "Кўр-кўрона шафқацизлик ва гуманитар ёрдам блокадаси эксклавни ўлим тузоғига айлантирди. "Буни тўхтатиш керак", деди у.

Исроил Бош вазири Бинямин Нетаняху Ғарб етакчиларини ХАМАСни қўллаб-қувватлаётганликда айблаб, қаттиқ қаттиқ танқид қилди. Бунга жавобан Лондон ва Париж Стрипга гуманитар ёрдам етказилишини “оммавий ва тўсиқсиз” бўлишини талаб қилди.