Европа давлатлари Трампнинг даъволари фонида Дания ва Гренландияни қўллаб-қувватлади

"Гренландия унинг халқига тегишли. Дания ва Гренландияга оид масалаларни фақат Дания ва Гренландиянинг ўзи ҳал қилиши мумкин", дейилади Франция, Германия, Италия, Полша, Испания, Буюк Британия ва Дания етакчиларининг қўшма баёнотида.

Баёнот Оқ уйда Гренландия АҚШ хавфсизлик тизимининг бир қисми экани ва Қўшма Штатларнинг таркибига кириши лозимлиги айтилганидан сўнг эълон қилинди.

Европа етакчилари БМТ низомида мустаҳкамланган тамойиллар, жумладан суверенитет, ҳудудий яхлитлик ва чегараларнинг дахлсизлиги муҳимлигини таъкидлади. Шунингдек, улар Гренландия Дания Қироллиги таркибида бўлиб, НАТО аъзоси эканини қайд этди ҳамда Арктикадаги хавфсизлик алянсдаги иттифоқчилар, жумладан АҚШ билан биргаликда “жамоавий тарзда таъминланиши” кераклигини билдирди.