«Eurovision»: Исроил сабаб тўртта давлат танловни бойкот қилди

Пайшанба куни Европа эфир узатувчилар иттифоқининг (EBU) Исроилга «Евровидение-2026»да қатнашиш учун расмий рухсат бергани ортидан мусиқа танлови атрофида катта баҳс ва норозилик келиб чиқди. Ирландия, Испания, Нидерландия ва Словения бу қарорга қарши чиқиб, келгуси йили бўлиб ўтадиган танловни бойкот қилишини эълон қилди.

Қатор Европа давлатлари Исроилни гуманитар оқибатларга сабаб бўлаётган Ғазодаги уруш фонида танловдан четлатишни таклиф қилган эди. Бундан ташқари, улар EBUни овоз бериш тизими билан боғлиқ эҳтимолий манипуляциялар юзасидан хавотир билдирган.

Ушбу давлатлар Исроил масаласини EBU умумий мажлисида яширин овозга қўйишни талаб қилди. Бироқ Женевада бўлиб ўтган йиғилишда бундай овоз бериш рад этилди ва унинг ўрнига келишувга асосланган янги қоидалар қабул қилинди.

«Аъзоларнинг кўпчилиги иштирокни чеклаш бўйича қўшимча овоз беришга ҳожат йўқлигини билдирди. «Евровидение-2026» режалаштирилган форматда, лекин кучайтирилган хавфсизлик чоралари билан ўтказилади», – дейилади EBUнинг расмий баёнотида.

Исроил президенти Исаак Герцог EBU қарорини қўллаб-қувватлаб, уни «Исроилни сукутга чўктиришни истаганларга қарши қўйилган бирдамлик ва дўстлик рамзи» деб атади.

Қарор эълон қилингач, Нидерландия миллий телекомпанияси Avrotros танловдан чиқишини маълум қилди. Улар бу ҳолатни ўз жамоатчилик қадриятлари билан мос келмаслигини айтишди.

Шундан кейин Испания ҳам ўз иштироки ва трансляциясини тўхтатишини билдирди. Бу эса жуда катта аҳамиятга эга, чунки Испания «Катта бешлик» аъзоси сифатида танлов молиялаштирилишида энг катта ҳисса қўшувчилардан бири ҳисобланади.

«Биз на финал, на ярим финалларни эфирга узатамиз. Мавжуд шароитда иштирок этиш мумкин эмас», – дея баёнот берди Испаниянинг RTVE телекомпанияси.

«Евровидение-2026» ҳозирча режалаштирилган тарзда ўтказилиши кутилмоқда, аммо айрим йирик Европа давлатларининг бойкоти мусиқа танловининг нуфузи ва бирдамлигига жиддий зарба бўлиши мумкин. Исроилнинг қатнашиши атрофидаги сиёсий можаро танловни мусиқий эмас, балки геосиёсий майдонга айлантириб қўяётгани айни пайтда янада яққол кўринмоқда.