Эрдоған: "15 июль қаҳрамонона қаршилиги жаҳон демократияси тарихида беназир ҳодисадир”

"Туркия сиёсий тарихидаги энг шафқатсиз давлат тўнтаришига уринишлардан бири бундан роппа-роса 10 йил аввал, 2016 йил 15 июль куни содир бўлган эди. Мамлакатимизнинг давлат муассасаларига яширинча жойлашиб олган террористик оқим томонидан амалга оширилган ушбу давлат тўнтаришига уринишнинг мақсади Туркияни узоқ йиллар давом этадиган тартибсизлик ва беқарорлик муҳитига судраб, халқимизнинг келажагини ўз назорати остига олиш эди. Азиз халқимиз давлат тўнтаришига уринганларга ўз истиқлоли ва истиқболини қатъият билан ҳимоя қилиб жавоб берди ҳамда бу қаҳрамонона қаршилик орқали бу заминда миллий иродани ҳеч қачон асир этиб бўлмаслигини бутун дунёга яққол намойиш этди. Турк халқининг 15 июль кечаси кўрсатган фаросати, жасорати ва донишмандлиги шубҳасиз, жаҳон демократияси тарихи нуқтайи назаридан ҳам беназир ҳодисадир.

Фатҳуллоҳчи террорчилик ташкилоти (ФEТЎ) томонидан амалга оширилган ушбу хоинона давлат тўнтаришига уриниш одатий бир ҳарбий тўнтаришга уринишдан ташқари, мамлакатимиз мустақиллигига таҳдид солган кенг кўламли босқин ташаббуси эди. Давлат тўнтаришига уринганларнинг дастлабки нишони миллий ирода ва халқимиз мустақиллигининг тимсоли бўлган Президентлик мажмуаси ҳамда Туркия Буюк Миллат Мажлиси бўлди. 15 июль кечаси қилган мурожаатимда бугунги кунгача халқ иродаси ва қудратидан устун ҳеч қандай кучни тан олмаганимни алоҳида таъкидлаган эдим. Бу сўзларни айтар эканман, турк халқи ўз иродасини қатъият билан ҳимоя қилишига ишончим комил эди. Дарҳақиқат, ўша кечанинг ўзидаёқ улкан иймон ва юксак ишонч билан кўчаларга чиққан халқимиз террорист тўданинг зулми ва ҳукмронлиги остида яшашни қатъиян рад этди. Мамлакатининг мустақиллиги, демократик ютуқлари ва эркин иродасини ҳимоя қилиш йўлида жонини фидо қилишдан ҳам қайтмаган халқимиз қаҳрамонона қаршилик кўрсатиб, давлат тўнтаришига уринганларни тор-мор этди ҳамда авлоддан авлодга фахр билан ҳикоя қилинадиган миллий ирода достонини яратди.

Миллатимизнинг жасоратли ва қатъий позициясидан илҳом олиб, биз ҳам ушбу хоинона уринишнинг салбий оқибатларини тез фурсатда бартараф этиш мақсадида қатъий чоралар кўрдик. Давлатнинг барча муассасаларида сиёсатдан ташқари воситалар орқали демократик тизим фаолиятига зарар етказиши мумкин бўлган ҳар қандай тузилмани таҳдид манбаи бўлишдан чиқаришга қаратилган таркибий ислоҳотларни зудлик билан ҳаётга татбиқ этдик. Шундан сўнг, кураш олиб бораётган бошқа террор ташкилотларини бутунлай йўқ қилиш стратегияси асосида мамлакат ичида ва ташқарисида амалга оширган операцияларимизда муҳим натижаларга эришдик. Ниҳоят, бирлик ва ҳамжиҳатлик тарихимизда янги бир саҳифа очган «Террорсиз Туркия» жараёнини бошладик.

«Террорсиз Туркия» жараёни «Туркия асри» стратегик қарашимизнинг асосий босқичларидан бири бўлиб, у қамровли ва бирлаштирувчи ёндашув асосида, тегишли хавфсизлик тузилмаларимизнинг саъй-ҳаракатлари ҳамда сиёсий тузилмаларнинг қўллаб-қувватлаши билан, Аллоҳга ҳамд бўлсинки, ўз мақсади сари ишончли қадамлар билан илгарилаб бормоқда. «Террорсиз Туркия» жараёнининг муваффақияти нафақат мамлакатимиз, балки бутун минтақамиз тинчлиги ва осойишталигига ҳам муносиб ҳисса қўшишига ишонаман.

Мамлакатимизнинг иқтисодий фаровонлиги ва тараққиётини ҳам нишонга олган ушбу давлат тўнтаришига уринишни амалга оширганларга қарши олиб борган курашимиз натижасида энергетика, транспорт, соғлиқни сақлаш, қишлоқ хўжалиги, технология ва мудофаа каби соҳаларда амалга оширган лойиҳаларимиз орқали янада фаровон келажак сари дадил қадамлар ташладик. Сўнгги ўн йил давомида амалга оширган Миллий технологиялар ташаббуси билан мудофаа, авиация ва космик саноат соҳаларида улкан ютуқларга эришдик. Электр ва интеллектуал транспорт тизимларини ривожлантирдик, соғлиқни сақлаш ҳамда қишлоқ хўжалиги соҳаларига йўналтирилган йирик инвестициялар орқали халқимизнинг фидойилигига муносиб бўлишга интилдик. Шу билан бирга, ушбу давр мобайнида бутун дунёда эътироф этилган миллий бренд маҳсулотларимизни ҳам яратдик. Улар орасида электр автомобилимиз ТОГГ (TOGG), миллий жанговар самолётимиз КААН (KAAN), миллий ҳарбий кема корветларимиз ҳамда учувчисиз ҳаво воситаларимиз энг аввало тилга олинадиган ютуқларимиздир.

Шу билан бирга, ўтган ўн йил давомида Туркия ташаббускор ташқи сиёсат ёндашуви асосида ҳам минтақавий, ҳам глобал миқёсдаги инқироз ва можароларни ҳал этишда муҳим иштирокчи сифатида алоҳида ўрин эгаллади. Инқироз ҳукм сураётган барча ҳудудларда биз кучлининг эмас, мазлум ва ҳақ томоннинг ёнида туриб, тинчлик ва осойишталикни таъминлаш йўлида масъулиятни зиммамизга олишдан ҳеч қачон чекинмадик. Қаерда зулм ёки адолатсизлик бўлса, ўша ерда халқаро ҳуқуқ, адолат ва виждоннинг овози бўлдик. Бугун Туркия минтақавий ва глобал масалаларда иштироки ва ҳиссаси юксак қадрланадиган, сўзига ишонч билдириладиган ҳамда фикрига мурожаат қилинадиган мамлакат сифатида эътироф этилаётган бўлса, бу муваффақият замирида 15 июль кечаси ўз истиқлоли ва истиқболини жонини фидо қилиш эвазига ҳимоя қилган азиз халқимизнинг мустаҳкам иродаси мужассамдир.

Халқаро ҳамкорлик зарур бўлган терроризмга қарши кураш ташқи сиёсатимизнинг кун тартибидаги устувор йўналишлардан бири бўлиб қолмоқда. Маълумки, ФEТЎнинг хориждаги тузилмаларида ташкилот ичидаги парчаланиш жараёни сўнгги икки йил ичида жадаллашди. Шу билан бирга, айрим давлатлар ушбу ташкилотни ҳозирга қадар, гарчи яширин шаклда бўлса-да, қўллаб-қувватлаётгани ва унинг аъзоларига бошпана бераётганидан хабардормиз.

Ўз мақсадларига эришиш йўлида ҳар қандай воситани жоиз деб биладиган, турли қиёфаларга кирадиган, демократия, эркинлик ва инсон ҳуқуқлари каби тушунчаларни ҳам суиистеъмол қилишдан тийилмайдиган ФEТЎга нисбатан доимо ҳушёр бўлиш зарурлигини шу муносабат билан алоҳида таъкидламоқчиман.

15 июль кечаси давлат тўнтаришига уринганлар томонидан 253 нафар фарзанди шаҳид этилган халқ сифатида халқаро ҳамжамиятдан Туркиянинг ҳақли курашини қатъий қўллаб-қувватлашларини кутиб қоламиз. Глобал тинчлик, хавфсизлик ва фаровонлик фақат барча террор ташкилотларига нисбатан икки хил мезон қўлламасдан олиб бориладиган қатъий ва муросасиз кураш ҳамда самимий халқаро ҳамкорлик орқали таъминланиши мумкин".

Ражаб Тоййиб Эрдоған, Туркия Президенти