Доналд Трамп суиқасд қурбони бўлган тарафдори Чарли Киркни "ўз авлодининг гиганти" деб атади

АҚШ президенти бу ҳақда Аризона штатида бўлиб ўтган Киркни хотирлаш маросимида айтди, дея хабар бермоқда BBC.

"Бугун бутун Америка қайғу, шок ва мотам ҳолатида. Ҳеч биримиз Чарли Киркни ҳеч қачон унутмаймуз ва тарих ҳам уни унутмайди", — деди Трамп ўз нутқида.

Президентнинг сўзларига кўра, Кирк "эркинлик ва адолат йўлида курашгани учун радикаллашган, совуққон ва шафқатсиз махлуқ томонидан ваҳшийлик билан ўлдирилган".

BBC'нинг хабар беришича, Аризона штатидаги Глендейл шаҳридаги стадионда ўтказилган хотира маросимига Қўшма Штатлар маъмуриятининг деярли барча аъзолари, жумладан вице-президент Жей Ди Вэнс, давлат котиби Марко Рубио ва Пентагон раҳбари Пит Ҳегсет қатнашди.

Маросимда миллиардер Илон Маск президент Доналд Трампнинг ёнида кўриниш берди. Трансляция кадрларида у Трамп билан нималардир ҳақида гаплашиб, кейин қўл бериб кўришгани намойиш этилди.