Доналд Трамп сешанба куни Мисрга боради — Axios

Нашрнинг бир нечта манбаларига таяниб хабар беришича, АҚШ президенти душанба, 13 октябр куни эрталаб Исроилга бориши, Кнессетда (Исроил парламенти) нутқ сўзлаши ва гаровга олинган исроилликларнинг оилалари билан учрашиши режалаштирилган.

Ўша куни кечқурун у Миср президенти Абдул Фаттоҳ ас-Сисси билан учрашиш учун Мисрга бориши ва Ғазо келишувининг уч кафолатчиси – Миср, Қатар ва Туркия етакчилари билан ушбу келишувни имзолаши кутилмоқда.

Шунингдек, Трамп Шарм аш-Шайхда Ғазо масаласида ташкил этиладиган саммитда иштирок этиши мумкин. Маълумотларга кўра, ушбу саммитда қатнашиш учун Германия, Франция, Буюк Британия, Италия, Қатар, БАА, Иордания, Туркия, Саудия Арабистони, Покистон ва Индонезиянинг давлат ва ҳукумат раҳбарлари ёки ташқи ишлар вазирларига ҳам таклифномалар юборилган. Бироқ Исроил Бош вазири Бинямин Нетаняхунинг саммитда иштирок этиши кутилмаяпти.

АҚШ расмийлари Трампнинг саммитда иштирок этиш режасини Axios'га тасдиқлаган. Саммит сешанба куни эрталаб ўтказилиши режалаштирилган, аммо манбалар унинг душанбага кўчирилиши ҳам мумкинлигини таъкидламоқда.