Демократ конгрессмен Шри Танедар Трампга қарши “импичмент бўйича еттита модда”ни тақдим этди.
Мичиган штатидан конгрессмен Қўшма Штатларнинг амалдаги президентини "адолатга тўсқинлик қилиш, ҳокимиятни суиистеъмол қилиш, ваколатларни ўзлаштириш, порахўрлик ва коррупцияда" айбламоқда.
Трампга қўйилган айбловлар орасида Килмар Абрего Гарсияни депортация қилиш ҳам бор. Конгрессменнинг сўзларига кўра, бу шахс ноқонуний равишда Салвадорга жўнатилган. Танедар, шунингдек, Конгресс рухсатисиз Илон Маск бошчилигида Ҳукумат самарадорлиги департаменти (DOGE) ташкил этилгани ва у орқали айрим ҳукумат идораларининг молиялаштирилиши қисқартирилганини ҳам танқид қилди.
Импечментга яна бир сабаб сифатида Трампнинг савдо тарифлари сиёсати келтирилган. Конгрессменнинг фикрича, бу халқаро иқтисодиётга салбий таъсир кўрсатган. Танедар журналистларга босим, сўз эркинлигининг бузилиши ҳолатларини ҳам эслатиб ўтди.
"Доналд Трамп чекланмаган ҳокимиятни ўз қўлига олишга ва президентликнинг АҚШ Конституциясида белгиланган чегараларини йўқ қилишга ҳаракат қилмоқда. Бизнинг мамлакатда президент бор, қирол эмас. Бу шунчаки хатолик эмас, бу импичментга асос бўладиган хатти-ҳаракатдир", – дея изоҳ берди Танедар.
Конгрессдаги демократлар етакчиси Ҳаким Жеффрис Танедарнинг айбловлари билан ҳали батафсил танишиб чиқмаганини маълум қилди.
"Ушбу ташаббус ҳақиқий оқибатларга олиб келиши даргумон. Чунки ҳозирда республикачилар Конгресс Вакиллар палатаси ва Сенатида кўпчиликни ташкил этади", деб ёзади Ахios.
Эслатиб ўтамиз, бошқа демократлар ҳам Трампга қарши импичмент бўйича ташаббус кўрсатишни режалаштирмоқда. Масалан, Техас штатидан конгрессмен Эл Грин импичмент лойиҳасини тайёрлаётганини маълум қилган.
