Defensa Central: 39 ёшли Серхио Рамос "Реал"дан таклиф бўлса, уни жон деб қабул қилади

"Монтеррей"нинг 39 ёшли марказий ҳимоячиси Серхио Рамос Мадриднинг "Реал" клубига қайтиши мумкин. Бу ҳақда Defensa Central хабар бермоқда.

Манбага кўра, испаниялик футболчининг "Реал"га шов-шувли қайтиши қишки трансферлар даврида рўй бериши мумкин. Рамоснинг Мексика клуби билан шартномаси якунланмоқда, шу боис у бир ойдан сўнг эркин агентга айланади. Шу билан бирга, "қаймоқранглилар"га тажрибали марказий ҳимоячи жуда зарур.

Рамос 2005-2021 йилларда "Реал" шарафини ҳимоя қилган. Бу вақт ичида у 671 та ўйинда майдонга тушиб, 101 та гол урди ва 40 та голли узатма муаллифига айланди.

Мексиканинг "Монтеррей" клуби сафида Рамос жорий йилнинг февраль ойидан буён тўп тепиб келмоқда. Унинг ҳисобида 30 та ўйин ва еттита гол бор.