Абдуқодир Ҳусанов ЖЧ-2026'да иштирок этадиган ТОП-100 футболчи рейтингига киритилди

The Athletic нашри саҳифаларида келаси ёзда жаҳон чемпионатида иштирок этиши керак бўлган энг яхши 100 футболчи рейтинги эълон қилинди.

Ушбу рейтингнинг биринчи поғонасига муаллифлар "Реал" сафида мунтазам гол уриб келаётган Франция терма жамоаси форварди Килиан Мбаппени қўйишган. Қизиғи, ўтган мундиал финалида Аргентинага қарши ўйинда Мбаппе хет-трик қайд этган, аммо французлар 3:3 ҳисобидаги дурангдан кейин пенальтилар сериясида мағлуб бўлишганди.

Иккинчи поғонадан Норвегия терма жамоасига 1998 йилдан бери илк бор жаҳон чемпионатига чиқишга ёрдам берган Эрлинг Холанд жой олди. Кучли учликни Ламин Ямал якунлаб берди.

Кейинги ўринларни Харри Кейн, Педри, Жуд Беллингем, Винисиус Жуниор, Лионель Месси, Кевин де Брюйне ва Жанлуижи Доннарумма эгаллади.

Криштиану Роналду - 25-ўринда. Ўзбекистон терма жамоаси ҳимоячиси Абдуқодир Ҳусанов - 86-ўринда.