BYD электромобиллар сотишда Teslaни ортда қолдиришга яқин

BYD (Хитой) тақдим этган ҳисоботга кўра, компания тўртинчи чоракда рекорд кўрсаткичлар қайд этиб, 2024 йилда 1,76 миллионта электромобил сотди.

Ушбу бозорнинг амалдаги етакчиси Tesla эса 2024 йилнинг уч чорагида 1,29 млн дона электромобил сотди, яъни компания яна 476 минг дона машина сотган тақдирда йилни карвонбоши сифатида якунлайди, акс ҳолда хитойликлар ўзиб кетади. Tesla келаётган ҳафтада ҳисоботини эълон қилиши кутилмоқда.

BYD Teslaни чоракларда сотилган машиналар сони бўйича бир йил аввал ортда қолдирган, аммо йиллик сотувларда ҳали пешқадамликка эришган эмас.

Яна бир жиҳатни ҳисобга олганда, хитойликлар аллақачон илгарилаб кетишган. Яъни гибрид элекромобилларни ҳам қўшганда BYD компанияси 2024 йил давомида жами 4,25 млн дона машина сотди. Биргина декабрнинг ўзида BYD бренди остида 510 мингта гибрид электромобил сотилган.