Буюк Британияда ҳаво ҳаракатини бошқариш тизимида юзага келган техник носозлик туфайли Олмаотадан Лондонга учган «Эйр Астана» авиакомпаниясининг самолёти Германиянинг Франкфурт шаҳрига қўнди.
Авиакомпания маълум қилишича, самолёт бортида 138 нафар йўловчи бўлган. Техник носозлик Лондоннинг Хитроу аэропорти фаолиятига ҳам таъсир кўрсатгани сабабли парвоз бошқа йўналишга бурилган.
«Эйр Астана» ушбу йўналишдаги навбатдаги рейсни бекор қилишга мажбур бўлган. KC663 рейсининг жўнаб кетиши вақтинча соат 11:30 га, Қозоғистон вақти билан 16:30 га кўчирилган.
Компания маълумотига кўра, 67 нафар йўловчида амалдаги Шенген визаси мавжуд эмас. Шу сабабли улар Франкфурт аэропортининг транзит ҳудудида қолиши керак. Парвозни кутаётган барча йўловчиларга овқат ва алкоголсиз ичимликлар учун ваучерлар берилган.
Шенген визасига эга йўловчиларни меҳмонхоналарга жойлаштириш ишларини ер усти хизматлари ва авиакомпания вакиллари ташкил қилмоқда. Бундай йўловчиларга аэропортдан чиқиб, шаҳарга кириш имконияти берилган.
Би-би-си хабар беришича, Буюк Британияда авиадиспетчерлар учун парвоз режалари ва бошқа операцион маълумотларни қайта ишлайдиган НАТС тизимида техник носозлик юзага келган.
Носозлик оқибатида 1000 тагача авиарейс бекор қилинган. Хитроу аэропортига йўл олган 13 та рейс Буюк Британия ва Европанинг бошқа аэропортларига йўналтирилган. Шотландия ва Ирландиядаги айрим аэропортларда ҳам муаммолар қайд этилган.
Шаҳноза Мирзиёева Мусулмон Юнусовнинг мурожаатига муносабат билдирди
Дунё харитаси 500 йил ичида илк бор янгиланди
💴 Адлия вазирлиги Ўзбекистондаги пенсия ва нафақалар миқдорини эслатди
