Буюк Британия қироли: "Украина бизнинг муросасиз ёрдамимизга муҳтож"

Украина жаҳон кучларининг муросасиз қўллаб-қувватлашига муҳтож.

Sky News хабар беришича, бу ҳақда Буюк Британия қироли Карл III АҚШ Конгрессидаги нутқида таъкидлаган.

2001 йил 11 сентябрда Нью-Йоркда содир бўлган террористик ҳужумлар ҳақида гапирар экан, монарх Буюк Британия ва АҚШ террорга қарши бирлашганини ва икки мамлакат халқлари бир асрдан кўпроқ вақт давомида қилганидек, чақириққа биргаликда жавоб берганини таъкидлади.

"Бугунги кунда Украина ва унинг энг жасур фуқароларини ҳимоя қилиш учун ҳам худди шундай қатъиятлилик керак. Бу чинакам адолатли ва узоқ муддатли тинчликни таъминлаш учун керак", деди Британия қироли.

Агентликнинг ёзишича, Дональд Трамп ҳокимият тепасига келганидан бери, Россия-Украина можароси йилларида Киевнинг асосий ҳарбий иттифоқчиси бўлган АҚШ ўз иштироки ва ёрдамини камайтиришга ҳаракат қилиб, бошқа глобал можароларга устувор аҳамият бериб келмоқда.

Таъкидланишича, Буюк Британия қироли 2022 йилда мамлакат Россиянинг кенг кўламли босқинига дуч келганидан бери Украина ва унинг халқини фаол қўллаб-қувватлаб келган.