Бундестаг депутати: "Россиядан газ транзитини тўхтатиш Европадаги энергетика инқирозини янада кучайтиради"

Россия газининг Украина орқали транзитини тўхтатиш Европадаги энергетика инқирозини янада кучайтиради ва энергия нархининг янада ошишига олиб келади. Бу ҳақда "Германия учун муқобил" партияси фракциясидан Бундестаг депутати, парламентнинг энергия ва иқлимни муҳофаза қилиш қўмитаси аъзоси Штеффен Котре огоҳлантирди.

"Транзитни тўхтатиш бутун Европа иқтисодий ҳудудини заифлаштиради, энергия нархининг янада ошишига олиб келади ва энергия инқирозини ёмонлаштиради, Европа иқтисодиёти арзон энергия манбаи сифатида Россия газига боғлиқ бўлиб, узоқ муддатли таъминот ва рақобатбардошликни таъминлайди", - деди у.

Унинг сўзларига кўра, Россия гази транзитини тўхтатиш оқибатлари биринчи навбатда Россияга эмас, Европага таъсир қилади. Стеффен Котре Венгрия, Молдова, Словакия ва Чехиянинг газ таъминоти тўхтатилиши сабабли жиддий қийинчиликларга дуч келишига диққат қаратди. Депутатнинг қўшимча қилишича, транзитни тўхтатиш тўғрисидаги қарор Европа мамлакатларига етказиб бериш хавфсизлигини хавф остига қўяди ва Европанинг суюлтирилган газнинг қиммат импортига қарамлигини оширади. Унинг таъкидлашича, "Германия учун муқобил" партияси бу қадамни "бир томонлама ва узоқни кўзламаган" деб ҳисоблайди ва "Россия газини Европага тез етказиб беришни" ёқлайди.

1 январь куни Киев тегишли келишувни узайтиришдан бош тортгани сабабли Россия газининг Украина ҳудуди орқали Европага транзити бутунлай тўхтатилди. Аввалроқ “Газпром” Украина томонининг рад этиши уни ушбу йўналиш бўйлаб ёқилғи етказиб беришнинг техник ва ҳуқуқий имкониятидан маҳрум қилгани ҳақида хабар берган эди.