Британияда ноқонуний муҳожирларни меҳмонхоналарда жойлаштиришга қарши норозилик намойишлар кучайиб бормоқда

Ноқонуний муҳожирларни меҳмонхоналарга жойлаштириш амалиётига қарши намойишлар Буюк Британия бўйлаб тарқала бошлади.

Бу ҳақда The Daily Telegraph нашри хабар бермоқда.

Унга кўра, 26 июль куни Англия шарқидаги Норвич шаҳрида норозилик намойишлари бўлиб ўтган. Ноқонуний муҳожирлар жойлашган меҳмонхоналардан бири олдида Британия байроқлари кўтарган юзлаб одамлар йиғилиб, унинг ёпилишини талаб қилишди. Худди шундай норозилик намойишлари Лидс, Ноттингемшир, Саутгемптон (Гемпшир) шаҳарларида ҳам бўлиб ўтди. Мақолада айтилишича, айрим ҳолларда муҳожирларни ҳимоя қилишни тарғиб қилувчи гуруҳлар намойишчиларга яқинлашмоқчи бўлган, бироқ полиция уларни тўқнашмаслик учун четга тортиб олган.

The Daily Telegraph газетасининг хабар беришича, 27 июль куни мамлакат жанубидаги Борнмут (Дорсет) ва Саутгемптон, Саттон-ин-Эшфилд (Ноттингемшир), Вулверхэмптон (Ғарбий Мидлендлар), Альтринчам (Катта Манчестер) ва Эппинг (Эссекс) шаҳарларида янги норозилик намойишлари ўтказилиши режалаштирилган.

Июль ойи ўрталарида Эппингда содир бўлган воқеадан сўнг норозилик намойишлари кучайиб бормоқда. Шаҳарда яшовчи Эфиопиядан келган 38 ёшли қочқин 14 ёшли қизга жинсий тажовуз қилганликда айбланган. Шундан сўнг ўнлаб одамлар муҳожирлар жойлашган меҳмонхона олдига тўпланиб, унинг ёпилишини талаб қилишди. Намойишлар бир неча кун давом этди, 18 киши ҳибсга олинди, улардан 7 нафари айбланди.