Британия Саудия Арабистонига ҳусийлар ҳужумидан ҳимояланиш учун қирувчи самолётлар юборади

Буюк Британия Ямандаги ҳусийлар ҳужумларидан ҳимояланиш учун Саудия Арабистонига «Тайфун» қирувчи самолётларини жойлаштиришга қарор қилди. Бу ҳақда Financial Times нашри Британия Мудофаа вазирлигига таяниб хабар берди.

Қирувчи самолётлар Саудия Арабистони шаҳарлари ва муҳим инфратузилмасини Эрон томонидан қўллаб-қувватланадиган ҳусийларнинг ракета ҳамда учувчисиз учиш қурилмалари ҳужумларидан ҳимоя қилиш учун сафарбар этилади.

Шунингдек, Британия Саудия Арабистони ҳарбий штабига ёрдам бериш учун ҳарбий маслаҳатчиларини юборади. Оғир ҳарбий техникани мамлакат бўйлаб ташишга кўмаклашиш учун эса «Атлас А400М» транспорт самолёти жалб этилади.

Сўнгги ҳафталарда ҳусийлар Саудия Арабистонига ҳужумларини кучайтирган. Ар-Риёддаги Подшоҳ Холид халқаро аэропортига уюштирилган йирик ҳужум оқибатида камида 13 киши ҳалок бўлган, 300 дан ортиқ киши жароҳатланган. Шунингдек, жангарилар Даҳрон шаҳридаги «Сауди Арамко» давлат нефть компаниясининг бош қароргоҳига ракета зарбалари берган.

Британия мудофаа вазири Уэс Стритинг Саудия Арабистонига қарши ҳужумларни мутлақо қабул қилиб бўлмаслигини таъкидлади. Унинг айтишича, Британия ҳарбий-ҳаво кучларининг қирувчи самолётлари фақат мудофаа вазифаларини бажаради ва ҳусийларга қарши ҳужум операцияларида иштирок этмайди.

Bloomberg нашрининг қайд этишича, Британиянинг Саудия Арабистони мудофаасига бевосита жалб этилиши Лондоннинг муҳим иттифоқчисини қўллаб-қувватлаш борасидаги энг жиддий қадамларидан бири бўлиши мумкин.

Аввалроқ Саудия Арабистони валиаҳд шаҳзодаси Муҳаммад бин Салмон АҚШ президенти Дональд Трампдан ёрдам сўраган эди. Бироқ бу мурожаат ҳозиргача АҚШнинг ҳарбий аралашувига олиб келмаган. Туркия ва Покистон билан тузилган янги мудофаа келишуви ҳам Саудия Арабистонига чекланган ёрдам кўрсатмоқда.

Франция Саудия Арабистонининг Қизил денгиз соҳилидаги Янбу портига радар тизимларини жойлаштирган. Миср ҳам яқин кунларда қиролликни қўллаб-қувватлаш масаласини кўриб чиқиши кутилмоқда. Форс кўрфази давлатлари Саудия Арабистонини қўллаб-қувватлашини билдирган, бироқ ҳусийларга қарши ҳарбий ҳаракатларда иштирок этишдан ҳозирча бош тортган.

«Тайфун» қирувчи самолётлари йирик учувчисиз учиш қурилмалари ва кўплаб қанотли ракеталарга қарши самарали курашиш имкониятига эга. Ушбу самолётлар Эронга қарши уруш даврида ҳам Форс кўрфазида мудофаа вазифаларини бажарган.

Ҳусийлар ҳужумлари туфайли Саудия Арабистони ўзининг йирик инвестиция тадбирларидан бири — Future Investment Initiative конференциясини ҳам келаси йилга қолдиришга мажбур бўлган.