Британия Қозоғистондан аскар тайёрлайди

Қозоғистон ва Буюк Британия Мудофаа вазирликлари 2025–2026 йилларга мўлжалланган Ҳарбий ҳамкорлик режасини имзоладилар. Маросим Лондонда Қозоғистон Республикаси Мудофаа вазирлиги штаб бошлиғи, полковник Ербол Кумарбекули бошчилигидаги Қозоғистон делегациясининг ташрифи доирасида бўлиб ўтди.

Томонлар икки томонлама ҳамкорликнинг бугунги ҳолатини муҳокама қилдилар ва келгуси икки йилга мўлжалланган устувор вазифаларни белгилаб олдилар. Асосий йўналишлар қозоғистонлик ҳарбий хизматчиларни Британия ҳарбий академияларида тайёрлаш, тинчликпарварлик ташаббусларини ривожлантириш ва тил ўргатиш сифатида белгиланди.

Битим икки давлат ўртасидаги стратегик яқинлашувнинг давоми бўлди. 2024-йил апрел ойида Остона шаҳрида Қозоғистон ва Буюк Британия ташқи ишлар вазирликлари раҳбарлари стратегик шериклик тўғрисидаги битимни имзолаган эди. Буюк Британиянинг ўша пайтдаги ташқи ишлар вазири Девид Кемерон Марказий Осиё мамлакатларидаги дастурларни, жумладан энергетика, таълим, нодир металлар ва савдони қўллаб-қувватлаш учун 50 миллион фунт стерлинг ажратилишини эълон қилган эди.

Имзоланган келишувлар фонида Қозоғистон ҳам мудофаа мустақиллигини мустаҳкамламоқда: май ойида артиллерия ўқ-дорилари, жумладан, НАТО стандартларига жавоб берадиган 155 мм снарядлар ишлаб чиқарадиган янги завод қурилиши бошланди. Ҳукумат таъкидлаганидек, лойиҳа импортга қарамликни камайтириш ва минтақавий беқарорлик шароитларига мослашишга қаратилган.