Бепул даволайдиган болалар орфан касалликлари рўйхати 5 дан 10 тагача кенгайтирилади

Шавкат Мирзиёев 3 ноябрь куни кам учрайдиган (орфан) касалликларга чалинган болаларга тиббий ёрдамни яхшилаш, фармацевтика соҳасидаги ислоҳотларнинг ижроси ҳамда янги лойиҳалар юзасидан тақдимот билан танишди, деб хабар қилди президент матбуот хизмати.

Бугунги кунда 5 турдаги орфан ва ирсий-генетик касалликларга чалинган жами 2174 нафар бола давлат бюджети маблағлари ҳисобидан бепул диагностика, дори воситалари ва махсус шифобахш озиқ-овқат билан таъминланиб келинмоқда.

Ушбу турдаги касалликларнинг диагностика қилиш сифатининг яхшиланиши натижасида орфан касалликларининг янги турлари аниқланмоқда ва даволанишга муҳтож болаларнинг сони ортиб бормоқда

Тақдимотда кам учрайдиган (орфан) ва бошқа ирсий-генетик касалликларга чалинган болаларга тиббий ва ижтимоий ёрдам кўрсатишни ташкил этиш бўйича ишлаб чиқилган 2026−2030 йилларга мўлжалланган чора-тадбирлар дастури тўғрисида ахборот берилди.

Дастурга кўра, эндиликда даволаниши давлат ҳисобидан қамраб олинадиган касалликларнинг сони 5 тадан 10 тага кенгайтирилади, ёш чегараси 18 дан 21 га узайтирилади. Дастурни амалга ошириш учун 2026−2030 йилларда жами 961 миллиард сўм маблағ йўналтирилиши кўзда тутилмоқда.

Давлат раҳбари тегишли қарорни имзолади ва дастурни тасдиқлади.