Бектемир Мелиқўзиев АҚШдаги бокс оқшомида ганалик Сена Агбеко устидан ғалаба қозонди

АҚШнинг Невада штати Лас Вегас шаҳрида ўтказилган профессионал бокс оқшомида ўзбекистонлик Бектемир Мелиқўзиев навбатдаги жангини ўтказиб, ғалаба қозонди.

Суперўрта вазн тоифасида иштирок этаётган боксчи ганалик Сена Агбекога қарши рингга кўтарилди. Еттинчи раундда рақибини техник нокаутга учратган Мелиқўзиев ўзига тегишли бўлган WBA қитъалараро чемпионлик камарини муваффақиятли ҳимоя қилди. Бу Бектемир учун профессионал рингдаги 17-ғалаба бўлди.

Учрашув Бектемир учун бир оз қийин бошланди. Биринчи раунднинг ўзида рақиб боши билан зарба бериб юбориши натижасида ўзбекистонлик чарм қўлқоп устасининг қоши ёрилди. Шунга қарамай, Мелиқўзиев жанг назоратини ўз қўлида ушлаб турди ва якунда муддатидан олдин ғалабага эришди.

Жангдан сўнг Бектемир Мелиқўзиев ўз таассуротлари билан ўртоқлашди:

“Бу жангга худди аввалгиларида бўлгани сингари жиддий тайёргарлик кўргандим. Афсуски, биринчи раунддаги кутилмаган жароҳат бир оз панд бериб қолди. Рақибим бош билан зарба бериб юборди ва натижада қошим ёрилди. Шунга қарамай, муҳим ғалабани қўлга киритганимдан хурсандман. Мени қўллаб-қувватлаган барчага раҳмат”.​

Кетма-кет иккита муҳим ғалабадан сўнг Бектемир энди асосий мақсад сари ҳаракат қилишини билдирди:

“Мақсадим — жаҳон чемпионлик камари! Ўйлайманки, тез орада бу камарни Ўзбекистонга олиб келамиз. Мен чемпионлик жангига тайёрман”, дея таъкидлади боксчимиз.

Маълумот учун, 29 ёшли Мелиқўзиев профессионал фаолияти давомида бунга қадар 17 та жанг ўтказиб, 16 та ғалаба ва 1 та мағлубият қайд этган эди. У 10 та жангда рақибларини муддатидан аввал мағлуб этган. Бугунги ғалаба унинг проф-боксдаги 17-муваффақияти бўлди.