Замбия собиқ президенти жасади саккиз ойдан бери музлаткичда сақланмоқда

Замбия собиқ президенти жасади вафот этганига саккиз ойдан ошган бўлса ҳам, Жанубий Африкадаги дафн хизмати музлаткичида сақланмоқда.

Бунга собиқ президент Эдгар Лунгунинг оиласи билан мамлакатнинг амалдаги президенти Ҳакаинде Ҳичилема ўртасидаги келишмовчилик сабаб бўлган.

Маълумотларга кўра, Лунгу 2025 йил 5 июнда 68 ёшида вафот этган. Вафотидан олдин у оиласига Ҳичилемани жасадига яқинлаштирмасликни буюрган. Оила амалдаги президент иштирок этмаган ҳолда шахсий дафн маросимини ўтказишни талаб қилмоқда, Замбия ҳукумати эса давлат маросими ўтказилишини истамоқда.

Дафн маросими билан боғлиқ низо судга кўчган. Август ойида Жанубий Африка суди Замбия ҳукуматига жасадни она юртига олиб келишга рухсат берди. Лунгунинг синглиси Берта суд залида йиғлаб, Ҳичилемани марҳумнинг жасади билан анъанавий маросимлар ўтказмоқчи бўлганликда айблади. Ҳичилема эса бу айбловларни рад этиб, ўзининг христиан эътиқоди анъанавий маросимларга ишонишга йўл қўймаслигини таъкидлади.

Asocciated Press'нинг ёзишича, Замбияда бу ҳолат нафақат сиёсий, балки маънавий низо сифатида ҳам қабул қилинмоқда. Мамлакатда анъанавий эътиқодлар кенг тарқалган бўлиб, ўлимдан олдинги лаънат жиддий қабул қилинади.