«Барселона» президенти — «Реал»нинг «Олтин тўп» маросимини бойкот қилиши ҳақида: «Ютқазишни билиш керак»

«Барселона» президенти Жоан Лапорта Мадриднинг «Реал» клуби иккинчи йил кетма-кет «Олтин тўп» тақдимот маросимини бойкот қилгани юзасидан фикр билдирди.

«Хоҳлашса, нима қилаверишсин. Биз «Барса» ҳақида қайғурамиз. Мукофот номзодлари ва ташкилий қўмитага ҳурмат юзасидан маросимларда қатнашамиз. Бу — спортни тушунишнинг бир қисми. Спортда ғалаба ҳам бўлади, мағлубият ҳам. Аммо юта билиш билан бирга, ютқазишни ҳам билиш керак. Бизга омад кулиб боққан — кўп ғалаба қозонамиз, кам мағлуб бўламиз», — дея Лапорта сўзларини Sport.es келтирди.

Эслатиб ўтамиз, ўтган йили ОАВ хабарига кўра, «Қироллик клуби» маросимни бойкот қилган, чунки «Олтин тўп» «Реал» ҳужумчиси Винисиус Жуниорга эмас, «Манчестер Сити» яримҳимоячиси Родрига топширилишини олдиндан билиб қолган. Натижада Винисиус овоз беришда иккинчи ўринни эгаллаган эди.