"Барселона" Ла Лига доирасидаги 1 та ўйинини АҚШда ўтказиш орқали қанча ишлаб олиши мумкинлиги маълум бўлди

"Вильярреал"нинг "Барселона" билан учрашуви АҚШда бўлиб ўтиши мумкин. Клублар декабрь ойида Ла Лиганинг 17-турида Майамида бўлиб ўтадиган ўзаро ўйинни океанортида ўтказиш учун ариза беришди ва Испания Қироллик футбол федерацияси бу сўровни маъқуллади. RAC1 хабарига кўра, агар режа амалга ошса, "кўк-анорранглилар" АҚШдаги ҳар бир ўйин учун тахминан 5-6 млн евро ишлаб олади.

Ўтган мавсумда "Барселона" Испания чемпионатида "Реал"ни 4 очкога ортда қолдириб, биринчи ўринни эгаллаган эди. "Вильярреал" бешинчи бўлди ва у ҳам Чемпионлар лигасига йўл олди.

16 август куни Каталония гранди Ла Лига янги ўйинининг биринчи тури доирасида "Мальорка" меҳмони бўлади, бир кун аввал "сариқ сувости кемаси" ўз уйида "Реал Овьедо"ни қабул қилади.