Жаҳон чемпионати-2026 мезбони Ўзбекистонга 50 минг доллар таклиф қилди

Ўзбекистон терма жамоаси Жаҳон чемпионатига тайёргарлик жараёнида бир қатор жамоалар билан ўртоқлик учрашувлари ўтказишни режалаштирмоқда. “Дарё” манбаларига кўра, Канада футбол ассоциацияси Ўзбекистон билан спарринг ўйини ташкил қилиш таклифи билан чиққан. Шимолий Америка жамоаси бу баҳсни ўтказиш учун Ўзбекистон футбол ассоциациясига 50 минг доллар таклиф қилгани айтилмоқда.

Унга кўра, ўйин борасида томонлар келишувга эришган. Аввалроқ Ўзбекистон футбол ассоциацияси терма жамоалар бўлимининг собиқ раҳбари Шерзод Игамбердиев 2026 йил 1 июнда Жаҳон чемпионати мезбонларидан бири билан ўртоқлик ўйини ўтказиш бўйича келишув бўлганини маълум қилганди. “Дарё” манбасининг қайд этишича, мазкур рақиб — Канада.

Шу билан бирга, Ўзбекистон март ойида Криштиану Роналду бошчилигидаги Португалияга қарши ўртоқлик ўйини ўтказиши мумкинлиги ҳақида ҳам хабарлар тарқалганди. Ҳатто Ўзбекистон футбол ассоциацияси вице-президенти Равшан Эрматовнинг собиқ FIFA ҳаками, ҳозирда Португалия футбол федерацияси президенти бўлиб ишлаётган Педро Проэнса билан мулоқот қилгани айтилганди.

Аммо 5 декабрь, жума куни бўлиб ўтган қуръада Ўзбекистон ва Португалия бир гуруҳдан жой олди. Бу эса Жаҳон чемпионати олдидан икки жамоа ўртасида ўртоқлик учрашуви бўлмаслигини англатади.

Маълумот учун, Ўзбекистон терма жамоаси Жаҳон чемпионати гуруҳ босқичи учрашувларини Мексика ҳамда АҚШ майдонларида ўтказиши кутилмоқда. Унга кўра, “оқ бўрилар” илк турда Колумбияга қарши майдонга тушса, иккинчи турда Криштиану Роналду бошчилигидаги Португалия билан ўйнайди. Каннаваро жамоаси охирги турда Конго/Ямайка/Янги Каледония ўртасидаги учрашувлар ғолибига қарши майдонга тушади.