“Барса” бу трансфер учун курашда “Реал”ни ортда қолдирмоқчи

“Ливерпуль”нинг Англия чемпионлигини қўлга киритишига катта ҳисса қўшган франциялик ҳимоячи Ибраима Конате Испаниянинг икки гранди ўртасида талаш бўлмоқда.

26 ёшли ўйинчининг шартномаси 2026 йилнинг 30 июнь куни тугайди. Мерсисайдликлар уни “Энфилд”да қолишга кўндира олмади.

“Реал” анчадан бери Конатени нишонда ушлаб турибди. Мадридликлар худди Трент Александер-Арнольд билан бўлганидан Ибраима билан ҳам олдиндан трансферни келишиб қўймоқчи бўляпти. “Қироллик клуби” Конатени келаси ёз эркин агент сифатида ўз жамоасига қўшиб олмоқчи.

Mundo Deportivo нашрининг маълум қилишича, Конате учун курашга “Барселона” қўшилди. Каталония клуби хўжайинлари Ибраима германиялик мураббий Ханс-Дитер Флик амалга ошираётган лойиҳага идеал даражада мос, деган хулосага келди.

Демак, “Реал” ва “Барса” нафақат футбол майдонида, балки ундан ташқарида ҳам ўз мақсадларига эришиш учун жиддий рақобат қилишига тўғри келади.