Баҳодир Жалоловнинг жанги бекор бўлди

Бугун, 6 феврал куни Канаданинг Монреал шаҳрида профессионал бокс оқшоми бўлиб ўтади. Унда супероғир вазн тоифасидаги ўзбекистонлик боксчи, икки карра Олимпиада чемпиони Баҳодир Жалолов ҳам ринга кўтарилиши режалаштирилганди.

Жанг оқшомида Баҳодир Жалолов франциялик Девид Спилмонтга қарши рингга кўтарилиши керак эди. Аммо жангдан олдин шифокорлар тиббий хулосасига кўра, ўзбекистонлик спортчига лабидан чиққан ҳуснбузар сабаб жанг қилишга рухсат берилмади ва жанг бекор қилинди.

Ўзбекистонлик боксчи шундан кейин инстаграмдаги саҳифаси орқали мухлисларга мурожаат қилди.

«Арзимаган учуқни деб шундай ҳолат бўлди. Тўғрисини айтсам, бу менда ёшлигимдан бор, ҳаво алмашсам, бир давлатдан бошқа давлатга учганимда бу нарса чиқади. Рақибим ҳам, мен ҳам жанг қилишни хоҳладик, лекин бу ерда комиссия рухсат беришмади. Тўғриси, хаёлга келмаган нарсалар бўлди. Бокс тарихимда бундай ҳолат бўлмаган. Олимпиада ўйинларида ҳам менда 2-3 та учуқ чиққан, аммо бу жангим бекор бўлишига сабаб бўлмаганди. Бу ерда эса комиссия бу масалага жиддий қараркан, биз ҳеч нарса қила олмаймиз. Ҳаммаси яхшиликка», - дейди у.