Астон Мартин Трамп божлари туфайли АҚШга автомобиллар импортини чеклади

Британиянинг “люкс” автомобиллар ишлаб чиқарувчи Aston Martin компанияси президент Доналд Трамп томонидан жорий этилган божлар туфайли АҚШга импортни чекламоқда, деб ёзади Financial Times.

Апрель ойидан бошлаб АҚШда мамлакатга олиб кириладиган тайёр хорижий автомобиллар учун 25%лик божлар амал қилмоқда, Америкада ишлаб чиқарилмайдиган Aston Martin ҳам бунга дуч келди.

Aston Martin апрель ойида АҚШга етказиб беришни қисқартирди ва май ойида уни оширмайди. Автомобиль ишлаб чиқарувчиси ўзининг америкалик дилерлари захираларига таянади ва уларнинг ёрдами билан савдо урушидан омон қолишга умид қилмоқда, дея таъкидлайди FT.

“Биз аллақачон энг ёмон сценарийга тайёрланиб бўлдик. Британия автомобиль саноатига солиқ юкламалари миқдорини инобатга олган ҳолда, британиялик бозор иштирокчилари учун келишувни тезроқ тузиш ҳукумат ва саноат учун энг устувор вазифа бўлиши лозим ва шундай бўлиши керак”, — дея таъкидлади компания бош директори Адриан Холлмарк.

Унинг айтишича, компания июнь ойи ўрталаригача етадиган етарли захирага эга. Ўтган йил охиридан бошлаб то божлар кучга киргунга қадар Aston Martin ўз автомобилларини асосан АҚШга жўнатишга устуворлик берган.

Тайёр хорижий автомобиллар учун амалдаги бождан ташқари, АҚШда 3 майдан бошлаб импорт қилинадиган автомобиль эҳтиёт қисмлари учун 25%лик тарифлар жорий этилади.